उपप्रधानमन्त्री एंव परराष्ट्रमन्त्री कमल थापाले जनताले चाहे हिन्दू राज्य र राजतन्त्र फर्किन सक्ने बताएका छन्। संवैधानिक राजतन्त्र र हिन्दु राज्यको मागमा आफू र आफ्नो पार्टी कत्ति पनि बिचलित नभएको बताउँदै थापाले जनताले चाहे र विश्वास गरे राजतन्त्र फर्किन सक्ने दबाी गरेका हुन्।
रिपोर्टर्स क्लब दाङले शनिवार घोराहीमा गरेको साक्षात्कारमा उपप्रधानमन्त्री थापाले आफ्नो पार्टी आफ्ना मूल्य र मान्यताबाट कत्तिपनि विचलित नभएर सरकारमा सामेल भएको बताए।
उनले कुनै पनि व्यवस्था परिवर्तनका गर्न पहिलाको जस्तो आन्दोलन आवश्यक नरहेको वताए। उनले भने,‘संविधान अपरिवर्तनीय होइन। संशोधन गर्न सकिन्छ। त्यसैले संविधानकै माध्यमबाट आफ्ना मुद्दा स्थापित गराउन सकिन्छ, अब आफ्ना माग सम्बोधन गराउनका लागि पहिलेको जस्तो आन्दोलन आबश्यक छैन। कोही असन्तुष्ट भएर सडकमै उत्रिएर, सिमामा बसेर अवरोध गरेर हुँदैन।’
थापाले आफ्नो पार्टीले संवैधानिक राजतन्त्र र हिन्दू राष्ट्रको माग गर्दै आएको भएपनि बहुमतको कदर गर्दै संविधानलाई स्वीकार गरेको स्पष्ट पारे।
संघीयता कार्यान्वयन उच्चस्तरीय समिति गठनप्रति असन्तुष्टि
फरक प्रसंगमा उपप्रधानमन्त्री थापाले संघीयता कार्यान्वयनका लागि गठन गरिएको संघीयता कार्यान्वयन उच्चस्तरीय समितिप्रति असन्तुष्टि जनाए।
थापाले प्रयाप्त छलफल विनानै हतारमा समिति गठन गरिएको भन्दै असन्तुष्टि जनाएका हुन्। संविधान कार्यान्वयनको जिम्मेवारी संघीय मामिला तथा स्थानीय विकास मन्त्रालयको भएकोले आफू उक्त मन्त्रालयको जिम्मेवार पदमा रहेकोले आफूलाई नसोधेर समिति गठन गर्नु गलत अभ्यास भएको बताए।
उनले भने,‘मसंग छलफल नै नगरी समिति गठन भएको भन्ने सुन्दा म आश्चर्यमा परेको छु, एक पटक प्रधानमन्त्रीसंग कुरा गरेर समिति गठनको कुरा टुङ्गो लगाउँछु।’ उनले समिति गठन गर्दा जति सरसल्लाह हुनुपर्ने थियो त्यो नभएकोले त्यसलाई सच्चाउनुपर्ने बताए।
setopati