फोटो :फाइल फोटो
किशोर बुढाथोकी
विराटनगरः मोरङमा एकजना युवाबाट एउटै समयमा दुई बालिका बलात्कृत भएको घटना बाहिर आएको छ ।
केरौन–१ का २१ वर्षीय विनोद तामाङले छ र सात वर्षीय छिमेकी बालिकामाथि पालैपालो बलात्कार गरेको प्रहरी अनुसन्धानले देखाएको छ ।
बलत्कार गरिएको समय र स्थान एउटै रहेको जानकारी प्रहरीले दिएको छ । घरमा अभिभावक नभएको अवस्थामा आफ्नै घरमा ल्याएर तामाङले दुबै बालिकालाई फकाएर पालैपालो बलत्कार गरेको इलाका प्रहरी कार्यालय पथरीका प्रहरी निरीक्षक रमेश बस्नेतले बताए ।
बस्नेतका अनुसार चैत १९ गते तामाङबाट बालिका बलात्कृत भएपनि प्रहरीलाई ढिलो गरेर जानकारी प्राप्त भयो ।
प्रहरीलाई आफन्तले बुधबारमात्र घटनाका बारेमा जानकारी दिएका थिए । घटनाबारे ढिलो गरि जानकारी प्राप्त भएपनि तामाङलाई पक्राउ गरेर उनीविरुद्ध जवरजस्ती करणी ऐनअन्तर्गत मुद्धा चलाउन शुक्रबार म्याद थप गरेर अनुसन्धान प्रक्रिया अघि बढाइएको प्रनि बस्नेतले बताए ।
उनका अनुसार यस्ता घटनामा तत्काल खबर गर्नुपर्ने जानकारी नभएकाले आफन्तहरु प्रहरीसम्म आउन ढिलो भएको पाइएको छ । आफन्तका अनुसार घटनाबारे बालिकाले त्यही दिन अभिभावकलाई बताइसकेका थिए ।
बलत्कारबाट चोटग्रस्त भएका बालिकाको स्वास्थ्यअवस्था नाजुक बन्दै गएपछि स्वास्थ्य परीक्षण र उपचारका लागि आफन्तले स्थानीय मेडिकलमा भर्ना गरेका थिए । त्यहीँबाट घटना बाहिर आएको हो ।
उपचारमा संलग्न स्वास्थ्यकर्मीले बालिका बलात्कृत भएको घटना प्रहरीलाई जानकारी दिन सुझाव दिएपछि आफन्त कानुनी उपचारका लागि प्रहरीसम्म आइपुगेको जानकारी प्रनि बस्नेतले दिए ।
स्थानीयस्तरमा उपचार सम्भव नभएपछि दुबै बालिकालाई थप उपचारका लागि आफन्तले बीपी कोइराला स्वास्थ्य विज्ञान प्रतिष्ठान धरान लगेका छन् ।
उनीहरुको उपचारका लागि विभिन्न संघ संस्थाले पनि सहयोग गरिरहेको प्रहरीले जनाएको छ । उपचारमा संलग्न चिकित्सकले बालिका बलत्कृत भएको पुष्टि गरिसकेको प्रहरी स्रोतले बतायो ।
एउटा पुरुषले दुई बालिकालाई एकै समयमा एउटै स्थानमा बलात्कार गरेको यो पहिलो र अनौठो घटना भएको प्रनि बस्नेतले बताए ।
‘पीडकलाई कारवाही गरेर पीडितलाई न्याय दिलाउन प्रहरीले घटनाबारे गम्भीर रुपमा अनुसन्धान गरिरहेको छ’, उनले भने । बस्नेतका अनुसार तामाङले समेत घटना स्वीकार गरिसकेका छन् ।
त्यस्तै सात वर्षीया बालिकामाथि बलत्कार गरेको अभियोगमा प्रहरीले पथरीशनिश्चरे–८ का १४ वर्षीय किशोरलाई नियन्त्रणमा लिएको छ ।
गत चैत २२ गते पथरीशनिश्चरे ७ की एक बालिकामाथि बलत्कार गरेको आरोपमा नियन्त्रणमा लिइएका बालकको नाम भने प्रहरीले सार्वजनिक गरेको छैन ।
नियन्त्रणमा लिइएका बालकको परिचय नाम गोप्य राखिएको जानकारी प्रनि बस्नेतले दिए । आफ्नै घरको बाख्राको खोरमा लगेर उनले सात वर्षीया बालिका बलत्कार गरेको प्रहरीको अनुसन्धानले देखाएको छ ।
उनी विरुद्धपनि जवरजस्ती करणी ऐन अन्तर्गतको मुद्धा चलाउन म्याद गरेर अनुसन्धान प्रक्रिया अघि बढाइएको बस्नेतले बताए ।
annapurnapost
