चैत्र २४, २०७२- तीन वर्षअघि पाँच जनाको ज्यान जाने गरी गराइएको विस्फोटका मुख्य आरोपी निलम्बित सभासद सञ्जयकुमार साह सञ्चार उद्यमी अरुण सिंघानिया हत्यामा समेत संलग्न रहेको खुलासा भएको छ । सिंघानिया हत्याका मुख्य आरोपी चन्द्रदीप यादवले निलम्बित सभासद साह र उनका सहयोगी रामगोविन्द यादवले १० लाखको ‘सुपारी’ दिएर सिंघानियालाई हत्या गर्न लगाएको बयान दिएका छन् ।

सिंघानिया हत्याका आरोपीहरू निलम्बित सभासद साह, हत्याको जिम्मा लिने तत्कालीन सशस्त्र समूहका नाइके अर्जुन सिंह -प्रकाश विद्यार्थी) भनिने मुकेश चौधरी, गोली प्रहार गर्ने एकलाल भनिने योगेन्द्र सहनी र साहका पूर्वसहयोगी ओम यादवलाई धनुषा ल्याइएको छ । उनीहरू विभिन्न जिल्लाका कारागारमा थिए । पत्रकार सम्मेलनमार्फत बुधबार उनीहरूलाई सार्वजनिक गरिने स्रोतले जनाएको छ ।

स्रोतका अनुसार सिंघानिया अध्यक्ष रहेको जनकपुर टुडे सञ्चार समूह सम्बद्ध जनकपुर टुडे दैनिक तथा रेडियो टुडेमा प्रकाशित/प्रसारित समाचार तथा रेडियोका प्रबन्ध निर्देशक अनुराग गिरीको जग्गा बिक्रीसम्बन्धी विवादका कारण हत्या गराइएको खुलेको छ । २०६५ भदौ १४ मा जनकपुर-८ रामानन्द चोकस्थित जीवनाथ चौधरीको घरमा भएको डकैतीमा साह तथा प्रहरी उपरीक्षक छविलाल जोशी बञ्जाडे समेतको नाम जोडेर जनकपुर टुडेमा समाचार प्रकाशित भएको थियो ।

उक्त डकैतीमा संलग्नता आरोपमा पक्राउ परेका भरत झाले सार्वजनिक रूपमा दिएको बयान रेडियो टुडेले प्रत्यक्ष प्रसारण गरेको थियो । जनकपुर टुडेमा प्रकाशित समाचारलाई आधार बनाई ०६५ भदौ १८ मा साह समर्थित केही युवाले मिल्स एरियास्थित टुडे सञ्चार समूहको कार्यालयमा तोडफोड गर्दै सम्पादक तथा प्रकाशकलाई ज्यान मार्ने धम्की दिएका थिए । भोलिपल्ट त्यससम्बन्धी समाचार पनि प्रकाशित भएको थियो ।

साहले रेडियो टुडेका तत्कालीन प्रबन्ध निर्देशक गिरीको महेन्द्रनगर सखुवास्थित जग्गा सस्तोमा लिन खोजेका थिए । उक्त जग्गा स्थानीय व्यवसायीको हातबाट महँगोमा बिक्री गर्न लगाउनु पनि हत्याको एक कारण रहेको यादवले बयानमा उल्लेख गरेका छन् । यद्यपि, जनकपुर टुडे वा रेडियो टुडेमा प्रकाशित/प्रसारित समाचारमा सञ्चार समूहका अध्यक्ष सिंघानियाको कुनै हस्तक्षेप नरहेको परिवारका सदस्यको भनाइ छ ।

सिंघानियालाई ०६६ फागुन १७ मा शिवचोकमा गोली हानी हत्या गरिएको थियो । ०६९ वैशाख १८ मा रामानन्द चोकमा गराइएको विस्फोटमा पाँच जनाको मृत्यु भएको थियो । दुवै घटना साहकै निर्देशनमा भएको प्रहरीले बताएको छ ।