फोटो :फाइल फोटो
‘उद्यमीले नाकाबन्दीको फाइदा उठाए’
काठमाडौं: खाना पकाउने ग्यासको सिलिन्डर उत्पादन गर्ने उद्योगले नाकाबन्दीको समयमा सरकारको इजाजतबिना नयाँ सिलिन्डर बजारमा पुर्याएको आरोप लागेको छ।
उपभोक्ताबाट बढी रकम असुल गर्न उद्योगीले नाकाबन्दीको फाइदा उठाई नयाँ सिलिन्डर बजारमा ल्याएको ग्यास विक्रेता महासंघले जनाएको छ।आपूर्ति मन्त्रालयमा शुक्रबार आयोजित बैठकमा महासंघका अध्यक्ष ज्ञानेश्वर अर्यालले सिलिन्डर उद्योगीले बढी मुनाफा आर्जन गर्न सरकारको इजाजतबिना नै २० लाखभन्दा बढी सिलिन्डर बजारमा ल्याएको बताए।
उनले भने, ‘यस्ता सिलिन्डर पुराना ग्राहकभन्दा नयाँ ग्राहकसँग बढी रकम लिएर वितरण गरिएको छ। पुराना उपभोक्ता भने महिनौंदेखि लाइनमा बसेर पनि ग्यास पाउन सकेका छैनन्।’ अध्यक्ष अर्यालले उद्योगीले इजाजतबिना ठूलो संख्यामा सिलिन्डर बजारमा ल्याएको आरोप लगाए पनि कुनकुन उद्योगले कति सिलिन्डर भित्र्याए भन्ने जानकारी भने दिएनन्।
अर्यालका अनुसार सिलिन्डर थप्नुअघि नेपाल आयल निगमसँग इजाजत लिनुपर्छ। तर, उद्योगीले आधी तौलको सिलिन्डर बाँड्दा उपभोक्ताको घरमा थन्किएको बहाना बनाउँदै अवैध रूपमा २० लाखभन्दा बढी नयाँ सिलिन्डर थपेको अर्यालले आपूर्तिमन्त्री गणेशमान पुनलाई जानकारी गराए। ‘यस्ता सिलिन्डर बढी रकम लेनदेन र पहुँचको आधारमा नयाँ ठूला घरानियाँलाई मात्रै बिक्री गरियो’, उनले भने, ‘यसरी उद्योगी नाकाबन्दीको मौकाको फाइदा उठाएर कालोबजारी गरी करौडौं रुपैयाँ उपभोक्ताबाट असुल्न सफल भए।’
बैठकमा उत्पादन क्षमता १४ हजार सिलिन्डर रहेको श्रीमाया ब्रान्डमा सिलिन्डर उत्पादन गर्ने ग्यास उद्योगले नाकाबन्दीको समयमा ३८ हजार पुर्याएको भन्दै अनुगमनकारी निकायको आलोचना गरिएको थियो। निगमका प्रवक्ता मुकुन्द घिमिरेले नाकाबन्दीको समयमा र अहिले कुनै पनि उद्योगलाई सिलिन्डरको संख्या थप्न इजाजत नदिएको दाबी गरे।
आपूर्तिमन्त्री पुनले ग्यासको सहज आपूर्ति र वितरण प्रणाली प्रभावकारी बनाउन स्मार्टकार्ड प्रणाली कार्यान्वयनमा ल्याउन गृहकार्य सुरु गरेको जानकारी दिए। सरोकारवाला निकायसँग छलफलको आधारमा केही महिनाभित्रमै उक्त कार्ड प्रणाली कार्यान्वयनमा ल्याउने उनको दाबी थियो।
मन्त्री पुनले ग्यास आपूर्ति र वितरण प्रणालीबारे तत्कालीन र दीर्घकालीन विषयमा पनि योजना बनाएर कार्यान्वयनमा ल्याइने बताए। मन्त्री पुनका अनुसार गत असोजमा चार हजार टन ग्यास आयात भएकोमा यो महिनामा ३० हजार मेट्रिक टनको हाराहारीमा आयात हुनेछ।
वाणिज्य विभागका महानिर्देशक शम्भु कोइरालाले मागअनुसार आपूर्ति नभएकाले बजारमा ग्यास सहज नभएको बताए । कोइरालाले अहिलेको अवस्थामा ग्यासको बजार सहज बनाउन कम्तीमा मासिक ३५ हजार मेट्रिक टन ग्यास आयात गर्नुपर्ने सुझाव दिए।
उपभोक्तावादी प्रेमलाल महर्जनले १६ लाख सिलिन्डर उपभोक्ताको घरमा होल्ड भएकाले पनि समस्या कायमै रहेको जानकारी दिए। बैठकमा सहभागी भएका उपत्यकाका तीनवटै जिल्लाका प्रमुख जिल्ला अधिकारीले उद्योगीका कारण बजारमा ग्यासको अभाव भइरहेको जानकारी गराएका थिए।
बैठकमा भक्तपुरका प्रमुख जिल्ला अधिकारी तेजप्रसाद पौडेल, ललितपुरका प्रमुख जिल्ला अधिकारी ऋषिराम शर्मा र काठमाडौंका प्रमुख जिल्ला अधिकारी रामकुमार सुवेदी सहभागी थिए।
annapurnapost