विश्वका घुम्नैपर्ने शहरमा काठमाडौं पनि ( फोटो फिचर )

ज्ञानेन्द्र खड्का

पहिलोमा लण्डन, २३औं मा काठमाडौं

काठमाडौं: विश्व चर्चित अनलाइन ट्रिप एडभाइजर डटकमले सन् २०१६ मा घुम्नै पर्ने शीर्ष २५ स्थानको सूची सार्वजनिक गरेको छ। ट्रिप एड्भाइजरले सार्वजनिक गरेको घुम्नै पर्ने शीर्ष २५ स्थानको सूचीमा नेपालसमेत परेको छ।

ट्रिप एड्भाइजरले नेपालको राजधानी सहर काठमाडौंलाई सन् २०१६ मा घुम्नै पर्ने स्थानको सूचीको २३ औं नम्बरमा अटाएको हो। उसले काठमाडौं उपत्यकालाई ऐताहासिक सहरको संज्ञा दिएको छ भने यहाँ प्राचीन मन्दिर र मूर्तिहरु रहेको उल्लेख गरेको छ।

काठमाडौं उपत्यकालाई आकर्षक गाउँहरुले भरिएको सहर भन्दै यहाँ दरबार स्क्वायरहरु, स्थानीय संस्कृति हेर्न पाइने उल्लेख गरेको छ। ट्रिप एड्भाइजरले काठमाडौं नजिकै जंगली जनावारको अवलोकन गर्दै पदयात्रामा जान सकिने पनि लेखेको छ।

त्यसैगरी यहाँ पर्यटकीय केन्द्र ठमेल पनि रहेको उल्लेख गर्दै मौलिक गलैंचा, कागजका सामाग्री र कालिगढहरुको उत्कृष्ट कला पनि हेर्न पाइने जनाएको छ। उसले यहाँका पसलहरुमा पुरातात्विक महत्वका सामाग्रीहरु पाइने जनाउँदै सन् २०१६ मा एक पटक काठमाडौं पुग्नैपर्ने सुझाव दिएको छ।

उसको सूचीको पहिलो स्थानमा बेलायतको राजधानी लण्डन परेको छ । दोस्रो नम्बरमा आईसआईसको निशानामा परिरहेको ट्रकीको इस्तान्बुल सहर परेको छ।

ट्रिप एड्भाइजरको घुम्नै पर्ने सूचीको तेस्रो नम्बरमा मोरक्कोको मर्राकेच सहर परेको छ । चौथो नम्बरमा फ्रान्सको राजधानी पेरिस रहँदा पाँचौ नम्बरमा कम्बोडियाको सिएम रेयाप सहर परेको छ।

घुम्नै पर्ने स्थानको छैटौं नम्बरमा चेक रिपब्लिकको प्राग सहर अटाएको छ । सातौं नम्बरमा इटालीको राजधानी रोम रहेको भने आठौं नम्बरमा एसियाली मुलुक भियतनामको हनोई सहर परेको छ।

ट्रिप एड्भाईजरको घुम्नैपर्ने स्थानको नवौं नम्बरमा अमेरिकाको न्यूर्योक सहर रहेको छ । दसौं नम्बरमा इन्डोनेसियाको उबुद रहँदा ११ औं स्थानमा स्पेनको बार्सिलोना सहरलाई ट्रिप एड्भाइजरले राखेको छ।

घुम्नै पर्ने स्थानको सूचीको १२ औं नम्बरमा पोर्चुगलको लिस्बन सहर पर्दा १३४ औं नम्बरमा युनाईटेड इमिरेट्सको दुबई सहर परेको छ। त्यसैगरी घुम्नै पर्ने सहरको १४ औं नम्बरको सूचीमा रसियाको सहर सेन्टपिटसबर्ग पर्न सफल भएको छ। थाईल्यान्डको बैंकक सहर १५ औं नम्बरमा रहेको छ।

१६ औं नम्बरमा नेदरल्यान्ड्सको आम्सटर्डम सहर अटाएको छ । सूचीको १७ औं नम्बरमा अर्जेन्टिनाको ब्यूनसआयर्स रहेको छ। १८ औं नम्बरमा चिनियाँ सहर हङकङ अटाउँदा १९ औं नम्बरमा मेक्सिोको प्लाया डे कारमेन परेको छ । त्यसैगरी २० औं नम्बरमा दक्षिण अफ्रिकाको केप टाउन सेन्ट्रल अटाएको छ।

घुम्नै पर्ने स्थानको सूचीमा जापानको टोक्यो २१ औं नम्बरमा रहेको छ । २२ औं नम्बरमा पेरुको क्युस्को रहेको छ भने २३ औं नम्बरमा नेपालको राजधानी काठमाडौं पर्न सफल भएको हो।