तस्बिरहरु : संजोग मानन्धर

मण्डला थिएटरको पार्किङ लटनेर अकस्मात् ट्रकमै रंगमञ्च तयार हुँदा छक्क परेका वरपरका मानिस एकाएक अघिल्तिर ओइरिए । आसपासका घरका बार्दली र झ्यालमा छिमेकीहरु दर्शक भएर कुँडुलो परे । पश्चिमा देशमा अभ्यास भइसकेको ट्रक थिएटर नेपालमा बिस्तार हुँदै गर्दा ९५ वर्षीय नाटककार सत्यमोहन जोशी, नेता रघु पन्त, दीप श्रेष्ठलगायत छक्क पर्दै थिए ।

‘१९९८ सालमा बालकृष्ण समले मौलिक नेपाली नाटक थालेर जसरी क्रान्ति ल्याए, त्यस्तै क्रान्ति हो यो,’ पाका रंगकर्मी जोशीले जोशिलो आवाजमा दर्शकतिर हेर्दै आवाज दिए, ‘युवा रंगकर्मीले केन्द्रिकृत नाटक कर्मलाई ट्रकमा गुडाउँदै देशका कुनाकाप्चासम्म पुर्‍याउनेछन् । यो रंगमञ्चको क्षेत्रमा ऐतिहासिक परिवर्तन हो ।’

एमाले नेता रघु पन्तले गतिलो थिएटर नभएको सहर वास्तविक अर्थमा ठूलो सहर नमानिने भन्दै मोबाइल थिएटरलाई शुभकामना दिए । गायक दीप श्रेष्ठको समूहले गीत सुनायो । मण्डलाका राजन खतिवडाले कयौं रात नसुतेरै देखेको सपना पूरा भएको भन्दै खुसियाली साटे । मण्डला थिएटरकी उपाध्यक्ष सिर्जना सुब्बाले जर्मन नियोग जिआइजेडबाट प्रदत्त ट्रकको साँचो बुझिन् । त्यसपछि अध्यक्ष दयाहाङ राईले भने, ‘वैशाखभित्रमा उपत्यकाका १५ ठाउँमा ट्रकमा नाटक देखाउँछौं, अर्को वर्ष देशभरि ।’

संयोगवश ट्रकनेर आइपुगेका निर्देशक खतिवडाका पितालाई देखेपछि संस्कृतिविद् तथा नाटककार सत्यमोहन जोशीले पुलकित हुँदै खादा ओडाउँदै सम्मान गरेका थिए । कान्तिपुर टिभीका समाचार प्रमुख दिलभूषण पाठक, कलाकार दीपकराज गिरीले रंगमञ्चमा नयाँ शैली भित्र्याएको भन्दै मोबाइल थिएटर सञ्चालकलाई बधाई दिए । कार्यक्रमको उद्घोषण गरिन्, अभिनेत्री प्रियंका कार्कीले ।

रंगकर्मीहरुले ट्रकको नाम ‘जुनकीरी’ घुम्ती रंगमञ्च दिएका छन् । स्थायी र केन्द्रीकृत नाटक मञ्चन परम्परा तोड्दै आफूहरुले दर्शकलाई नाटकघर नभई नाटकघरलाई दर्शकसम्म पुर्‍याउने लक्ष्य राखेको बताएका छन् । यसअघि २०६६ सालमा अस्थायी रुपमा घुम्ती रंगमञ्च चलाउदै देशाटन गरे पनि यसपल्ट स्थायी रुप दिन खोजेको उनीहरुको भनाई छ । ‘नाटकघरसम्म आउन नसक्ने अथवा थाहा नभएका तर कलामा चाख भएका समुदायमा जुनकीरी घुम्ती थिएटर केन्द्रित गर्दैछौं,’ मण्डलाको प्रेस नोटमा भनिएको छ ।

ट्रक रंगमञ्चको पहिलो नाटकलाई विप्लव प्रतीकले नेपालीमा उल्था गरेका हुन् ।