फोटो :दाङमा आयोजित पत्रकार भेटघाटमा बोल्दै मन्त्री पुन । तस्बिर: गजेन्द्र बोहरा
गजेन्द्र बोहरा
पेट्रोलियम कानुन बनाइ लागू गर्ने तयारी
तुलसीपुरः वाणिज्य तथा आपूर्ति मन्त्री गणेशमान पुनले पेट्रोलियम कानुन चाँडै बन्ने बताएका छन् । यसअघि नै पेट्रोलियम बनिसके पनि अझैसम्म त्यो न त लागू भएको छ न त नियमावलीहरु नै पूर्ण भएका छन् ।
इन्धन तथा खाद्यान्न डिपोहरुको स्थलगत निरीक्षणका लागि अहिले देशभ्रमणमा निस्किएका आपूर्तिमन्त्री पुनले शनिबार दाङका पत्रकारहरुसँग भने ‘चाँडै नै हामी कार्यविधि बनाउँदैछौँ, अब पेट्रोलियम कानुन बनाएर त्यो मेरै कार्यकालमा लागु गराउँछु ।’
त्यसका लागि कार्यदल बनाएर काम सुरु भइसकेको पनि उनले जानकारी दिए । त्यस्तै उनले आपूर्ति व्यवस्था, उपभोक्ता अधिकार तथा वितरण प्रणालीसम्बन्धी ऐन, नियमावलीहरुलाई परिमार्जन गर्ने र थप कडाईका लागि लागु गर्ने पनि बताए ।
उनले पेट्रोलियम कानुन नबन्द देशमा इन्धनको कालोबजारी मौलाएको भन्दै त्यसलाई रोक्नका लागि मन्त्रालयले हरसम्भव प्रयास गरेको पनि दाबी गरे ।
‘म आफैँ पनि अनुगमन गएर कतिपय निजी डिपाहरुमा छापा मारेको छु’ उनले भने ‘मन्त्रालयले करिब ४० जति कर्मचारी खटाएर देशभर अनुगमनको काम तीव्र पारेको छ ।’
उनले बजारमा अनुगमनको अभाव तथा उपभोक्ताको जागरणको कमीले पनि कालोबजारी मौलाएको बताए । ‘त्यसैले अब हामीले सबैभन्दा पहिला उपभोक्तामा जागरण ल्याउने खालका अभियान पनि सञ्चालन गर्नेछौँ ।’
नाकाबन्दीबाट नेपालीले पाठ सिक्नुपर्ने भन्दै उनले देशभर कम्तीमा चार–पाँच महिनाका लागि इन्धन भन्डारण गर्ने तयारी भइरहेको पनि बताए ।
त्यसका लागि देशभर अहिले भएका १० वटा इन्धन डिपोहरुमा सय प्रतिशत नै इन्धन भन्डारण गरिरहने पनि उनले जानकारी दिए ।
त्यस्तै उनले सातवटै प्रदेशमा प्रदेशस्तरीय इन्धन डिपो बनाउने तयारी भइरहेको पनि सुनाए । त्यसमध्ये एउटा डिपो प्रदेश नं. ५ का लागि दाङमा हुनेछ । उनले दाङको तुलसीपुरमा इन्धन डिपो राख्नका लागि आवश्यक पर्ने जग्गाको पनि निरिक्षण गरेका थिए ।
यहाँको तुलसीपुर उद्योग वाणिज्य संघको पहलमा सरकारकै नाममा रहेको कपास विकास समितिको जमिन इन्धन डिपोको लागि उपलब्ध गराउने सहमति भएको छ ।
त्यस्तै चीनबाट पनि एक तिहाइ इन्धन आपूर्तिका लागि सम्झौता अन्तिम चरणमा पुगेको र, प्रधानमन्त्रीको भ्रमणका क्रममा त्यसले पूर्णता पाउने पुनले बताए ।
‘प्रधानमन्त्रीको भ्रमणका लागि चीनसँग बृहत वाणिज्य सम्झौता हुनेछ’ उनले भने ‘त्यसमा इन्धनको आपूर्ति पनि बढाउने भन्ने कुरा छ ।’
उनले एउटामात्रै देशसँग व्यापार–सम्झौताले कस्तो पीडा भोग्नुपर्छ भन्ने कुरा यसपटकको भारतीय नाकाबन्दीले पाठ सिकाएको भन्दै सबै छिमेकी देशहरुसँग समान सम्बन्ध स्थापित गर्नुपर्ने बताए ।
रिपोटर्स क्लब दाङले गरेको पत्रकार भेटघाटमा आपूर्तिमन्त्री पुनले अझैँ पनि इन्धनको सहजता हुन नसकेको स्विकार पनि गरे ।
आएको इन्धन तथा ग्याँस क्षणभरमै वितरण गरेर सकिने भएका कारण पनि अहिले प्रशस्त भन्डारण हुन नसकेको उनको भनाई छ ।
‘त्यत्रो चारचार महिना खाली भयो, सबै भाँडाहरु रित्ता छन्, भर्खर आपूर्ति सहज हुन थालेको छ, अहिल्यै स्थिति सामान्य हुँदैन त्यसैले जति इन्धन अनि ग्याँस आएपनि नपुग्ने कारण त्यही हो ।’ त्यसमा पनि अझै शतप्रतिशत आपूर्ति हनु नसकेको उनले बताए ।
आयल निगमले अहिले आमउपभोक्तालाई प्रशस्त इन्धन पुर्याउन नसकेको र घाटासमेत व्यहोरिरहेको भन्दै उनले अहिलेको अवस्थामा निगमले बोनस बाँड्न नपाउने बताए ।
बोनस बन्द गर्नका लागि गत पुसमा नै उनी आफैले निर्देशन दिएर नबाँड्ने निर्णय गराएको पुनले बताए । ‘मेरै निर्देशनमा आयल निगमले बोनस नबाँड्ने निर्णय गरेको छ’ उनले भने ‘फेरि यो कुरा पटकपटक किन उठिरहेको भन्ने मलाई पनि थाहा छैन तर, बोनस बाँडिन्न ।’
annapurnapost