फाल्गुन ९, २०७२- आरक्षणको माग गर्दै हरियाणामा आन्दोलन गरिरहेका जाट प्रदर्शनकारीले नयाँ दिल्लीमा पानी ल्याउने नहर थुनिदिएपछि पानीको हाहाकार भएको छ । ‘टाइम्स अफ इन्डिया’का अनुसार दिल्लीका मुख्यमन्त्री अरविन्द केजरिवालले दिल्लीमा पानी सकिएको भन्दै नहर खुलाइदिन केन्द्रिय गृहमन्त्री राजनाथ सिंहलाई आग्रह गरेका छन् ।

जाटहरुलाई पिछडिएको जातिमा समावेश गर्नुपर्ने र सरकारी निकायमा आरक्षण दिनुपर्ने मागमा भएको आन्दोलनमा अहिलेसम्म १० जनाको मृत्यु भइसकेको छ ।

‘मुनाक नहर बन्द गरिएपछि दिल्लीमा पानी अभाव भएको छ,’ केजरिवालको भनाई उद्धृत गर्दै टाइम्स अफ इन्डियाले लेखेको छ । पानी अभावका कारण सोमबारसम्म स्कुलहरु पनि बन्द गरिएको छ । परिक्षाहरु स्थगित गरिएको छ । उनले पानी खुलाउनका लागि सेना परिचालन गर्नुपर्ने सुझाव पनि दिएको बताएका छन् ।

उनले पानी आए पनि वितरण व्यवस्था मिलाउन २४ घन्टा लाग्ने भन्दै सबैलाई पानी जोगाउन पनि अपिल गरेका छन् । राष्ट्रपति कार्यालय, प्रधानमन्त्री कार्यालय, अस्पताललगायतका अत्यावश्यक सेवा प्रदायकबाहेकले सिमित पानी मात्र पाउने पनि उनले बताएका छन् ।