रजेन्द्र केसी
फोटो :भारतलार्इ हराउँदै साग फुटबलको स्वर्ण जित्न सफल नेपाली खेलाडीहरू । तस्बिर: रजेन्द्र केसीगुहावाटीः भारतलाई उसैको भूमिमा घुँडा टेकाउँदै नेपाली फुटबल टोलीले २३ वर्षपछि फुटबलको ऐतिहासिक स्वर्ण पदक जित्न सफल भएको छ ।
बंगबन्धु फुटबलको उपाधि उचाल्दै जित्न बानी परेका नेपाली फुटबलरहरुले घरेलु मैदानमा भारतीय खेलाडीलाई रुवाउँदै स्वर्ण पदक घर भित्र्याए ।
ओलम्पिकदेखि अन्य ठूला प्रतियोगितामा पनि सबैभन्दा आर्कषक फुटबलको स्वर्ण जितेपछि फुटबलरहरुले नेपाली फुटबलको स्वर्ण युग अब शुरु भएको सन्देश पनि दिएका छन् ।
म्याच फिक्सिङको स्क्यान्ड र राजनीतिक हस्तक्षेपले नराम्ररी थलिएको फुटबलले देशदेखि विदेशसम्मका नेपालीमा खुसीको लहर ल्याएको छ ।
६ महिना लामो नाकाबन्दीबाट तंग्रिँदै गरेका नेपाली आफ्ना खेलाडीले एकातिर स्वर्ण जितेको खुसीमा झुमे भने अर्कातिर भारतलाई हराएको खुसीले अझै रमाए ।
भारतलाई हराउन खेलको ६६ औं मिनेटमा प्रकाश बुढाथोकीको सुन्दर फ्रिक टर्निङ प्वाइन्ट बन्यो । पहिलो हाफको ३३ औं मिनेटमा गोल खाएर कम्जोर बनेको नेपाली टोलीले दोस्रो हाफमा आक्रमक खेल्यो ।
त्यहीकारण भारतको पोस्टभन्दा २२ यार्ड बाहिर पाएको फ्रि किकलाई प्रकाश बुढाथोकीले भारतीय किपरले थाहै नपाउने गरी चमत्कारिक गोलमा परिणत गर्न सफल भए ।
नेपालका लागि निर्णायक गोल जारी सागमा सात गोल गर्न सफल नवयुग श्रेष्ठले गरे । उनले ७२ औं मिनेटमा गोल गर्दै २३ वर्षपछि सागको स्वर्ण भित्र्याउन योगदान दिए ।
नवयुगले समूह चरणको भुटानविरुद्धको र माल्दिभ्सविरुद्धको खेलमा ह्याट्रिक पुरा गरेका थिए । यसअघि बंगबन्धु गोल्डकपमा पनि ह्याट्रिसहित चार गोल गर्दै नवयुग सर्वाधिक गोलकर्ता बनेका थिए ।
चौथो पटक साग फुटबलको फाइनलमा पुगेको नेपालले यसअघि यसअघि सन् १९८४ र १९९३ को साग फुटबलमा स्वर्ण पदक जितेको थियो ।
annapurnapost