मंगलबार प्रति तोलामा १ हजारले बढेर सुनको मूल्य स्थानीय बजारमा प्रति तोला ५४ हजार कायम भएको थियो । बिहीबार फेरि मूल्य बढेर प्रति तोला सुनको भाउ ५४ हजार ५ सय कायम भएको हो ।
नेपाल सुनचाँदी व्यवसायी महासंघका अनुसार सोमबार ३ सय रु. घटेर प्रतितोला ५३ हजारमा झरेको सुनको मूल्य मंगलबारदेखि उच्च दरमा बढ्न थालेको हो । भाउ लगातार उकालो लागेपछि २ महिनाको अवधिमा सुन प्रति तोलामा ७ हजार ५ सय रुपैयाँ महंगो भइसकेको छ । पछिल्लो एकसातामा मात्र सुन प्रति तोला ३ हजार ५ सय रुपैयाँ बढेको छ । गत आइतबार सुन प्रति तोला ५१ हजार २ सय रुपियाँमा किनबेच भएको थियो ।
कात्तिकको पहिलो साता सुनको भाउ प्रति तोला ४७ हजार रुपियाँसम्म ओर्लिएको थियो । त्यसपछि उकालो लाग्न थालेको भाउ माघ लागेपछि साढे ४ हजार महंगो भइसकेको छ । माघ १ गते सुन प्रतितोला ४९ हजार ७ सयमा कारोबार भएको थियो ।
अन्तर्राष्टिय बजारमा समेत सुनको भाउ तीव्र रफ्तारमा उकालो लागिरहेको छ । अन्तर्राष्ट्रिय बजारमा भाउ लगातार बढेका कारण त्यसको प्रभाव नेपालको बजारमा समेत परिरहेको विश्लेषकहरुले बताएका छन् । अन्तराष्टिय संचारमाध्यमहरुका अनुसार तेलको मूल्य न्यून विन्दूमा झरेपछि लगानीकर्ताहरु सुरक्षित लगानीका लागि सुनतर्फ आकर्षित भएपछि सुनको भाउ बढ्न गएको हो । विश्व अर्थतन्त्रमा देखिएको समस्या र घट्दो तेलको मूल्यका कारण अन्तर्राष्ट्रिय बजारमा सुनको भाउ अझै बढ्ने संभावना रहेको विश्लेषकहरुले बताएका छन् । यसको अर्थ, नेपालको स्थानीय बजारमा समेत सुनको मूल्य अझ उकालो लाग्नेछ ।
सुनको भाउलाई पछ्याउँदै मंगलबार प्रति तोलामा १५ रुपियाँले बढेर ७१५ मा पुगेको चाँदीको भाउ बिहीबार चाहि स्थानीय बजारमा स्थिर रहेको नेपाल सुनचाँदी व्यवसायी महासंघले जनाएको छ ।
अन्तर्राष्ट्रिय बजारमा पनि नयाँ रेकर्ड
कच्चा तेलको मूल्यमा भारी गिरावट आएसँगै भारतीय बजारमा समेत सुनको मूल्य उकालो लाग्ने क्रम रोकिएको छैन । त्यहाँका संचारमाध्यमहरुका अनुसार स्थानीय बजारमा सुनको मूल्यमा जनवरी १ देखि हालसम्म प्रति दशग्राममा ४ हजार भारु वृद्धि भइसकेको छ । भारतमा प्रति दशग्राम सुनको मूल्य २८ हजार भारु नाघिसकेको छ । त्यहाँका विश्लेषकहले आगामी दुई महिनाभित्र सुनको मूल्य २९ हजार ५ सयसम्म पुग्नसक्ने प्रक्षेपण गरेका छन् । जनवरी १ मा २४ हजार ५ सयमा कारोबार भएको सुनको मूल्य दिल्लीमा  २८ हजार ५ सय  ८५ पुगेको छ भने मुम्बईमा २८ हजार ४ सय पुगेको छ ।
अन्तराष्टिय बजारमा पनि सुनको मूल्य उसैगरी बढिरहेको छ । सन् २०१५, २२ जुनपछि पहिलोपटक अन्तराष्टिय बजारमा सुनको मूल्य प्रति औंस १२ सय डलर भन्दा माथि पुगिसकेको छ । अन्तराष्टिय बजारमा तीव्र उकालो लागेको सुनको मूल्य सन् २०१३ को जुलाईपछि सबैभन्दा ठूलो बढोत्तरी रहेको एजेन्सीहरुले जनाएका छन् । अन्तराष्टिय बजारमा सन् २०११ पछि अहिले नै सबैभन्दा बढी लगातार रुपमा सुनको भाउ उकालो लागेको समेत बताइएको छ ।
विश्लेषकहरुले विश्वका प्रायजसो सबै शेयरबजारमा आएको मन्दीका कारण समेत लगानीकर्ताहरुले सुरक्षित लगानीका लागि सुनतर्फ आकर्षित हुँदा मूल्य बढ्न गएको दाबी गरेका छन् । भारत तथा नेपालमा सुनको मूल्य बढ्नुको अर्को कारण चाहि विवाहको मौसमले पनि हो ।

bizshala