माघ १, २०७२- नेपालले बंगबन्धु गोल्डकप फुटबलमा शुक्रबार आयोजक बंगलादेशसँग गोलरहित बारबरी खेलेको छ । यससँगै नेपाल समूह चरणमा अपराजित रह्यो र उपविजेताको रुपमा सेमिफाइनल प्रवेश गरेको छ ।

ढाकास्थित बंगबन्धु स्टेडियममा भएको पहिलो खेलमा श्रीलंकाले मलेसियन सुपरलिगको क्लब फेल्डा युनाइटेडलाई २–१ ले हराएको थियो । त्यस नतिजाले नै नेपाल र बंगलादेशको अन्तिम चार यात्रा पक्का भइसकेको थियो । पहिलो हाफमा बंगलादेश र दोस्रोमा नेपालले केहि राम्रो खेल पस्किएको थियो । यस्तोमा नेपाली गोलकिपर विकेश कुथुले दुई राम्रा बचाउ गरे ।

नेपाल र बंगलादेशले समूह ‘ए’मा समान ५–५ अंक जोडे । तर, राम्रो गोल अन्तरको आधारमा बंगलादेश शीर्षस्थानमा रह्यो । समूह चरणबाटै बाहिरिएका श्रीलंकाले ३ र फेल्डा युनाइटेडले २ अंक बनाएका थिए ।

अब नेपालले समूह ‘बी’को विजेतासँग खेल्नेछ । यो समूहमा माल्दिभ्स, बहराइन यू–२२, कम्बोडिया र बंगलादेश यू–२३ छन् । यसमा माल्दिभ्सले लगातार दुई जितसँगै एक खेल अगावै सेमिफाइनलमा स्थान सुरक्षित गरिसकेको छ ।

नेपालले पहिलो खेलमा फेल्डा युनाइटेडसँग गोलरहित बराबरी खेलेको थियो । नेपालले दोस्रो खेलमा श्रीलंकामाथि १–० को सफलता हात पार्दै २८ महिनायताको अजितविहिन यात्रालाई १२ खेलमा पूर्णविराम लगाएको थियो । त्यसपछि नेपालले फिफा वरीयतामा १७ स्थानमाथिको बंगलादेशसँग अंक बाँडेको हो ।