मेक्सिकोले पुनः पक्राउ गरिएका लागूऔषध कारोबारका नाइकेलाई अमेरिका सुपुर्दगी गर्ने प्रक्रिया शुरु गर्न लागिएको बताएको छ।
६ महिनाअघि जेल तोडेर भाग्न सफल ख्वाकिन गुसमानलाई शुक्रबार पुनः पक्राउ गरिएको थियो।
सरकारी निर्णयलाई चुनौती दिंदै उनका कानुन व्यवसायीहरुले ६ वटा निवेदन दायर गरेको बताएका छन्।
विगतमा गुसमान आफूलाई बुझाउन अमेरिकाले गरेको आग्रह मेक्सिकोले अस्वीकार गर्दै आएको थियो।
मेक्सिकोका अधिकारीहरुले फोटो खिच्न तयारी अवस्थामा रहेका क्यामेराहरुतिर ख्वाकिन गुसमानलाई हेर्न बाध्य पारे ताकि लागूऔषध तस्करीका ती कुख्यात नाइकेलाई हेर्ने मौका कसैले नगुमाउन्।
कडा सुरक्षा भएको जेलबाट फरार भई सरकारलाई मूर्ख साबित गर्ने प्रयासविरुद्ध त्यो बदलास्वरुपको कदम पनि थियो।
मेक्सिकोका आन्तरिक मामिलामन्त्रीले भने, “यस्ता अपराधीहरुको गिरफ्तारी ६ महिनाभन्दा बढी समययताको सेक्युरिटी क्याबिनेटका साथै त्यसका लागि काम गर्ने व्यवसायिक, साहसी र वफादारहरुको कठिन परिश्रमको नतिजा हो।”
एल च्यापो नामले पनि चिनिने गुसमानलाई मेक्सिकोमै निकै कडा सुरक्षा व्यवस्था भएको जेलमा ६ महिनाअघि सारिएको थियो तर धेरै समय उनलाई त्यहाँ राख्न सकिएन।
मेक्सिकोका महान्यायाधिक्ताले गुसमानलाई अमेरिका सुपुर्दगी गर्ने प्रक्रिया अब शुरु गरिने बताएका छन्।
जेलबाट गुसमान फरार हुनुअघि र पछि उनलाई सुपुर्दगी गर्न अमेरिकाले दुई पटक गरेको आग्रहका आधारमा उक्त प्रकिया शुरु गर्न लागिएको हो।
विगतमा सुपुर्दगी गर्न नमानेपनि, घुस खुवाउने र सरकारी निकायहरुलाई खरिद गर्ने क्षमताका कारण अब उनलाई देशभित्र राख्न नसकिने निष्कर्षमा मेक्सिकोका अधिकारीहरु पुगे जस्तो देखिन्छ।
दुई मुलुकले गरेको सुपुर्दगी सन्धिका आधारमा मेक्सिको सरकारले अमेरिकाको दुई पटककै आग्रहलाई अनुमोदन गरिसकेको छ।
फरार भएको ६ महिनापछि गुसमानलाई शुक्रबार लोस मोचिस शहरबाट पक्राउ गरिएको थियो।
सुरक्षाकर्मीहरुलाई देखेपछि ढलको पाइपबाट उनले भाग्ने प्रयास गरे तर मरिनहरु उनीभन्दा एक कदम अगाडि देखिए।
BBC
