२६ पुस, काठमाडौं । महाभूकम्पका बेला उद्धार कार्यमा सुरक्षा निकायको कामको खुबै तारिफ भयो । प्राकृतिक वा मानवीय कारणले भौतिक संरचना ध्वस्त हुँदा त्यहाँ पुरिएकाहरुलाई उद्धार गर्ने काममा साहस र चातुर्य मात्रै भएर पुग्दैन, प्रविधि तथा दक्ष जनशक्ति पनि चाहिन्छ ।
नेपाल प्रहरी अन्तरगतको विपद व्यवस्थापन विभागले ढलेका भवनबाट मानवीय उद्दार गर्न सक्ने आफ्नो क्षमता देखाउने प्रयास गर्यो । कार्यक्रममा प्रहरी महानिरीक्षक उपेन्द्रकान्त अर्याल पनि उपस्थित थिए ।
‘ढलेका संरचनाभित्रको खोजी तथा अनुसन्धान’ सम्वन्धी तालिमका क्रममा विभागका प्रमुख ठुले राईले महानिरीक्षकसमक्ष बि्रफिङ गरेका हुन् । फरक-फरक सामाग्रीबाट बनेका भवनमा फरक तरिकाले गरिने ‘खोजी तथा उद्दार विधि’ उक्त अवसरमा प्रस्तुत गरिएको थियो । ‘भुईंचालो वा अन्य प्राकृतिक कारणले भवन भत्किँदा त्यहाँभित्र पुरिएकाहरुलाई उद्दार गर्नु कठिन काम हो’ राई भन्छन्-‘यसमा हामीले वैदेशिक सहयोगसमेत लिएर आफ्नो क्षमता वृद्धि गरिरहेका छौं ।’
पुस २३ बाट सुरु भएको तालिम आठ दिनसम्म चल्नेछ । प्रहरी महानिरीक्षक अर्यालले भत्केका भवनबाट उद्धारका लागि दिइने तालिम कठिन र खर्चिलो समेत हुने गरेको बताए ।
यद्यपि, बितेका केही वर्षयता प्रहरीले आफ्नो क्षमता र साधनस्रोत धेरै हदसम्म विकास गरेको उनको भनाइ थियो । ‘पहिलेको तुलनामा धेरै प्रगति भएको छ’ उनले भने-‘यद्यपि अझै थप लगानी आवश्यक छ ।’
तस्वीरः कविन अधिकारी/अनलाइनखबर