कुमार लुइँटेल
फोटो :फाइल तस्बिरविराटनगर : नेपाली कांग्रेसका नेता रामचन्द्र पौडेलले आगामी महाधिवेशनमा आफू कुनै हालतमा सभापतिमा उठ्ने बताएका छन्।
एक नम्बर प्रदेशका जिल्ला सभापति, क्षेत्रीय सभापति र महासमिति सदस्यहरुको भेलालाई सम्बोधन गर्न शुक्रबार विराटनगर पुगेका पौडेलले भने, ‘मैले धेरै तयारी गरिसकेको छु । मैले यसपालि छोड्ने कुरा आउँदैन । मैले कुनै पनि हालतमा छोड्दिनँ ।’
सुशील कोइराला पनि उम्मेदवारी बन्ने चर्चा छ नि भन्ने जिज्ञासामा उनले भने, सुशीलजी यसपटक उठ्नुहुन्न । उहाँले मलाई सहयोग गर्नुहुन्छ ।
उनले यसपटक देशभरका कार्यकर्ताहरु आफूलाई सभापति बनाउने पक्षमा रहेको बताउँदै भने, सधै एकैजनाले अवसर पाउनु भएन नि। कार्यकर्ताले पनि न्याय खोज्ने बेला भएको छ ।
पौडेलसँगै कांग्रेसका महामन्त्री कृष्णप्रसाद सिटौला, महेश आचार्य र मिनेन्द्र रिजाललगायतका नेताहरु पौडेलसँगै विराटनगर पुगेका छन् ।
पौडेलले मधेसको आन्दोलनको सम्बोधन गर्नका लागि संसद्मा विधेयक अघि बढिसकेको र संशोधन पारित हुनसाथ आन्दोलन टुंगिने र नाकाबन्दी पनि खुल्ने बताए । उनले भने, ‘अब यो समस्या चाँडै टुंगिन्छ ।’
उनले पछिल्ला दिन मधेसी दलहरु पनि समस्याको छिटो समाधान खोज्न गम्भीर र लचिलो देखिएको बताउँदै भने, ‘मैलै भारत भ्रमणका क्रममा त्यहाँको नेतृत्वसँग यसबारेमा छलफल गरेको छु । उनीहरुले पनि संविधान संशोधन विधेयक पारित भएपछि नाकाबन्दी खुल्ने संकेत दिएका छन् ।’
annapurnapost
