प्रकाश ढुंगाना 
काठमाडौंको न्युरोडमा रहेको भाग्य लक्ष्मी ज्वेलर्स नै सुन तस्करीमा सम्लग्न रहेको पाइएको छ। महानगरीय अपराध महाशाखाले सो सुन पसलमा छापा मारेर साढे ९ किलो सुन बरामद गरेको छ। एक एक केजीमा ९ वटा र आधा किलोको एउटा सुनको विस्कुट प्रहरीले बरामद गरेको हो । प्रहरीले सुन पसलका संचालकद्वय विक्रम मित्तल र विबेक मित्तललाई पक्राउ गरेको छ।
उनीहरु दाजुभाई हुन्। भारतको वेष्ट बंगालको कालिङपुङका दुवै जना काठमाडौं सात आठ वर्षदेखि सुन व्यवसायी गर्दै आएका थिए। प्रहरीले सुन किन्न आएका एक भारतीय नागरिकलाई पनि सुन पसल अगाडीबाट पक्राउ गरेको छ। पहिले सुन किन्न आएका भागिरथ चौधरीलाई समातेको प्रहरीले पछि सुन पसलमा गएर छापा मारेको थियो।
संगठित रुपमा नै तस्करी
महानगरीय अपराध महाशाखाका एसएसपी सर्वेन्द्र खनालले उनीहरुले संगठित रुपमा नै सुन तस्करी गर्ने गरेको दाबी गरे। लामो समयदेखि उनीहरु सुन तस्करीमा सम्लग्न भएको भन्दै उनले उनीहरुमाथि सुन तस्करी र संगठित अपराधको मुद्दा चलाइने दाबी गरे। उनीहरुले चीनबाट सुन ल्याउने, कलंकीमा गएर लिने र पसलमा लगेर बेच्ने गरेको अनुसन्धानबाट देखिएको उनले सुनाए।
मामा चीनमा भान्जा मित्तल दाजुभाइ काठमाडौंमा
पक्राउ परेका मित्तल दाजुभाइले चीनबाट नेपाली नागरिक मामा भन्ने व्यक्तिले आफूहरुलाई सुन पठाउने गरेको वयान प्रहरीसमक्ष दिएका छन्। मामा भन्ने व्यक्तिको विवरण आइनसकेको र अनुसन्धान भइरहेको एसएसपी खनालले बताए। मामा भन्ने व्यक्ति व्यक्ति चीनमा नै बस्ने गरेको मित्तल दाजुभाइले बताएका छन् । मामा भन्नले चीनबाट पठाएको सुन आफ्नो पसलमा ल्याएर उनीहरुले भारतमा तस्करी गर्ने गरेको अनुसन्धानबाट खुल्न आएको छ।
.jpg)
सुन तस्करीबारे पत्रकार सम्मेलन गरेर जानकारी दिर्दै एसएसपी सर्वेन्द्र खनाल
सुन तस्कर तातोपानी नाकाबाटै
प्रहरीले बरामद गरेको सुन तातोपानी नाका हुँदै काठमाडौं आइपुगेको प्रहरीले दाबी गरेको। गत वैशाख १२ गते आएको भूकम्पपछि तातोपानी नाकाहुँदै सुनको तस्करी बढ्न थालेको छ । भूकम्पपछि राजस्व छलेर तातोपानी हुँदै काठमाडौं आइपुगेको सुन प्रहरीले ठूलो परिमाणमा समातेको यौ नै पहिलो हो। सुन लुकाएर ल्याउन सजिलो हुने भएकाले मित्तल दाजुभाइले भरिया नै खटाएर सुनको तस्करी गरिरहेको प्रहरीले जनाएको छ। भरियाहरुलाई उनीहरुले एक किलोको २५ हजारदेखि ५० हजारसम्म दिने गरेको खुल्न आएको छ ।
प्रहरीलाई १ करोड १६ लाख ५ हजार कमिसन
प्रहरीले बरामद गरेको साढे ९ किलो सुनको बजार मूल्य ४ करोड ६६ लाख रुपैयाँ छ। यसरी बरामद गरेको २५ प्रतिशत सुन प्रहरीलाई कमिसनका रुपमा दिनुपर्ने कानुनी प्रावधान नै छ। त्यही रकमबाट प्रहरीले सुराकीलाई पनि रकम बाँडनुपर्छ।
setopati