मनिका झा
फोटो : बन्दको प्रतिकार गर्ने क्रममा बिहीरबार जनकपुरका व्यापारीले जलाएका मोर्चा नेताका मवटरसाइकल। तस्बिर: अन्नपूर्णजनकपुरधाम: मधेसी मोर्चाले लामो समयदेखि जनकपुरमा गरेको बन्दको बिहीबार व्यापारीले प्रतिकार गरेका छन्। सोही क्रममा स्थानीय जानकीचोकमा मोर्चाका कार्यकर्ता र व्यापारीबीच झडप भएको छ।
मोर्चाका कार्यकर्ताले मोटरसाइकल जुलुस प्रदर्शनसहित पसल र व्यापारिक प्रतिष्ठानमा तोडफोड गर्दै जबर्जस्ती बन्द गर्न दबाब दिएका थिए।
व्यापारीले पसल बन्द गर्न नमानेपछि झडप भएको थियो।
सोही क्रममा मोर्चाका नेता र कार्यकर्ताले केही पसलमा तोडफोड गरेपछि अक्रोशित व्यापारीले स्थानीय जनकचोकमा जम्मा भई कोणसभाको तयारीमा रहेका सद्भावना पार्टीका जिल्ला अध्यक्ष सञ्जयकुमार सिंहको ज २ प ५४१९ र तराई मधेस सद्भावना पार्टीका जिल्ला अध्यक्ष रूपनारायण मण्डल चढेको ज ३ प २९९१ नम्बरको मोटरसाइकलमा आगो लगाएका हुन्।
आक्रोशित व्यवसायीको समूहले आक्रामक हुँदै जनकचोकमा संघीय समाजवादी फोरम नेपालका जिल्ला अध्यक्ष शेषनारायण यादव, सद्भावनाका सञ्जय सिंहसहित नेतालाई लखेटेका थिए । व्यवसायीले नेताहरूलाई आक्रमण गर्न खोज्दा उनीहरू चोकका होटेलमा छिरेका थिए । युवा व्यवसायीले होटेलभित्रै पुगेर नेतामाथि हातपात गर्न खोजेका थिए।
सद्भावनाका जिल्ला अध्यक्ष सिंहले भने कांग्रेसका जिल्लास्तरीय नेता तथा उद्योग वाणिज्य संघका वरिष्ठ उपाध्यक्ष विजयकुमार साहको इशारामा घटना भएको बताएका छन्।उद्योग वाणिज्य संघ जनकपुरका अध्यक्ष शिवशंकर साह हीराले लामो समयदेखि आन्दोलनमा व्यापारीहरूले सक्दो समर्थन गर्दै आए पनि पसल र व्यापारिक प्रतिष्ठानमा तोडफोड गर्नु दुःखदायी भएको बताए।
केही मधेसविरोधी तत्वले यस्तो घटना गराएको र मोर्चाका नेताहरूको मोटरसाइकल जलाउने कार्यमा पनि व्यापारीको नभई घुसपैठियाको हात रहेको साहको भनाइ छ।आक्रमणपछि संयुक्त लोकतान्त्रिक मधेसी मोर्चाका घटक दलहरूको बैठकले शुक्रबारदेखि आमहडताल थप सशक्त बनाउँदै उद्योग, व्यापार, कलकारखाना र सम्पूर्ण शैक्षिक संस्था बन्द गराउने निर्णय गरेको छ।
बैठकमा वाणिज्य संघका वरिष्ठ उपाध्यक्ष विजयकुमार साह, व्यवसायी आनन्द झा, पंकज जैन र सन्तोष साहलाई मधेसविरोधी घोषणा गर्दै उनीहरूको पसलमा तालासमेत लगाइएको छ। मोर्चा सम्बद्ध नेता तथा कार्यकर्ताको अगुवाइमा निस्केको जुलुसले चारवटै व्यापारीको पसलमा तालाबन्दी गर्दै सर्टरमा मधेसविरोधी लेखेको थियो।
annapurnapost