पुस २३, २०७२- आन्दोलनरत मधेसी मोर्चाका ११ बुँदे मागबारे टुंगो लगाउन बनाइएको संयुक्त कार्यदलको बैठकमा तीन दलले सीमांकन विवाद एक महिनाभित्रमा टुंग्याउन छुट्टै राजनीतिक संयन्त्र बनाउने प्रस्ताव अघि सारेका छन् ।

केहीअघि सिंहदरबारमा सकिएको बैठकमा तीनदलका तर्फबाट एक महिनाभित्र सीमांकन विवाद टुंग्याउन यस्तो प्रस्ताव गरिएको भए पनि मोर्चाले भने छुट्टै मोर्चा बनाउदा कानुनीदेखि अन्य जटीलता हुनेभन्दै कार्यदलबाटै टुंग्याउने प्रस्ताव गरेको छ ।

कार्यदलका सदस्य एवं तमलोपा उपाध्यक्ष हृदयेश त्रिपाठीले छुट्टै संयन्त्रलाई जिम्मा दिँदा भोलि त्यसको संवैधानिक, कार्यक्षेत्र र क्षेत्राधिकारको विवाद हुन्छ, वैधानिकतामा पनि प्रश्न उठ्ने भन्दै कार्यदलबाटै टुंग्उयाउनु पर्ने बताए । तीन दलका तर्फबाट बैठकमा सहभागी सदस्यले भने यो प्रस्तावमा मोर्चा सकारात्मक भएको बताएका छन् ।

२ बजेदेखि मोर्चाको बैठक भएकाले कार्यदलका सदस्यहरु तमलोपा कार्यालय बिजुली बजार आइपुगेका छन् । यो बैठक सकेर ४ बजे फेरि कार्यदलको बैठक बस्दैछ । कार्यदलमा तीन दलका तर्फबाट महेश आचार्य, भीम रावल र कृष्णबहादुर महरा सदस्य छन् भने मोर्चाका तर्फबाट हृदयेश त्रिपाठी, राजेन्द्र श्रेष्ठ र रामनरेस राय छन् ।