पुस २२, २०७२- भौतिक योजना तथा निर्माण मन्त्रालयको बजेटमा परे पनि पुल बनाउनका लागि टेन्डर नै नगरी फ्रिज भएपछि बझाङ छान्नाका बासिन्दाले सेती नदिमाथि आफैंले पुल बनाएका छन् । बर्षौ धाएर बल्लबल्ल पारेको बजेट फ्रिज भएपछि स्थानीयले तमैलमा गाडी चल्ने काठको अस्थायी पुल निर्माण गरेका हुन् ।

हिउँदको समयमा यो पुलले छान्ना क्षेत्रका ६ गाविसका २० हजारभन्दा बढी बासिन्दा लाभान्वित हुनेछन् । ‘राज्यले हाम्रो पटक–पटकको मागलाई बेवास्ता गरेपछि आफैंले सेतीमा काठको पुल बनाएर गाडी चलाएका हौ,’ छान्ना सडक निर्माण मूल समितिका संयोजक अर्जुन थापाले भने । उनले केही महिना भए पनि यहाँका बासिन्दाहरुले नागरिकता बनाउनका लागि एक दिन लगाएर हिँड्नु नपर्ने बताए । पुल नहुँदा एक घन्टाको बाटो हिँडेर नदि तर्नु पर्ने बाध्यता थियो । पुल निर्माणमा बझाङ जिविसले पनि सहयोग गरेको छ ।

यसअघि थापाकै पहलमा ‘एक व्यक्ति एक लिटर तेल’ अभियानबाट तमैलदेखि छान्ना हुँदै ६ गाविस जोडेर बाजुरा जोड्ने १३ किलोमिटर लामो तमैल–छान्ना– थामलेक सडक निर्माण भएको थियो ।
‘यो पुल सेतीले वर्षामा बगाउन सक्छ,’ टोपबहादुर खड्काले भने, ‘हरेक वर्ष हामीले यस्तो पुल बनाउन सक्दैनौं, राज्यको ध्यान तान्नका लागि यसरी बनाएका हौं ।’ उनले जनताको यो जोश र एकताको सम्मान गरेर तत्काल पक्की पुल बनाउनु पर्ने पनि बताए ।

पुल बनेकोमा खुशी व्यक्त गर्दै लामातोलाकी सरु गिरीले भनिन्, ‘हाम्रो उत्पादन बजार नपाएर कुहिएको थियो । बाहिरबाट आउने सामान पनि खच्चरबाट ल्याउनु पर्दा महंगो पथ्र्यो, गाडी पुगेपछि सस्तो होला कि ?’