पुस २२, २०७२- एमाओवादी छाडेर छुट्टै नयाँ दल बनाउने अभियानमा रहेका पूर्वप्रधानमन्त्री बाबुराम भट्टराईले चुनाव नजिती नेतृत्व नलिने बताएका छन् ।

पोखरामा बुधबार विहान नयाँ शक्ति अभियानको पत्रकार भेटघाटमा उनले भने, ‘माघभित्र नयाँ शक्ति पार्टीका रूपमा घोषणा हुन्छ । म नेतृत्वमा हुन सक्छु, नहुन पनि सक्छु ।’ आफूलाई सर्वसम्मत बनाउनुभन्दा निर्वाचनबाट नेतत्वमा आउन चाहेको उनले बताए ।

नयाँ शक्ति अभियानलाई मुलुकको आर्थिक विकासको एजेण्डा बोकेको दलको आकार दिइने भन्दै उनले यसको नेतृत्व निर्वाचनले तय गर्ने भनाइ उनको थियो । ‘नयाँ शक्ति पार्टीको नेतृत्व मैं हुन्छु, लिन्छु भन्दिन,’ उनले भने, ‘यसमा आउनु भएकाहरू कार्यकर्ताको मतले निर्धारण गर्छ ।’

एमाओवादीले अघि सारेको संविधानसभाबाट नयाँ संविधान र मुलुकलाई गणतन्त्र घोषणा आफ्नो डिजाइन भएको दाबी उनले गरे । नयाँ दल बनाएर अब आर्थिक समद्धिका लागि काम गर्न धेरैजनाको साथ पाएको उनले बताए । ‘अबको एजेण्डा आर्थिक विकास हुनुपर्छ’, उनले भने, ‘हामीले पार्टी घोषणा गर्दा विज्ञहरूसँग सल्लाह गरेर १० वा २० वर्षपछि समृद्ध नेपाल बनाउन केके गर्ने भन्ने योजना अगाडि ल्याउँछौं ।’

विकासका एजेण्डा अघि सार्दा अन्य दलभन्दा पृथक देखिने भएपनि आफूहरू बन्द–हड्तालको पक्षमा नलाग्ने भनाइ उनको थियो । नयाँ शक्ति युवा लक्षित पार्टी बनाइने र यसमा नेतृत्वमा पनि युवालाई नै अघि सार्ने उनले बताए । ‘डेढ करोड मतदातामा ४०/५० लाख पार्टीहरूमा लागेका होलान्, एक करोड मतदाता कतै छैनन्,’ उनले भने, ‘ती तटस्थ मतदाताले खोजेको जस्तो पार्टी बनाउँ भनेर हामी लागेका हौं ।’

कार्यक्रमममा उठेका केही प्रश्नमा उनले फरक बाटो हिड्न चाहनेलाई पुरानो दल, एजेण्डा र कुनैबेला भनिएका कुराको जवाफ दिन बाध्य पार्न नहुने बताएका थिए ।