पुस २२, २०७२- ९ सय मेगावाट क्षमताको अरुण तेस्रो आयोजनाको प्रवर्द्धक भारतीय कम्पनी सतलजले आयोजनाको प्रवेश मार्ग (सडक) निर्माणको जिम्मा सडक विभागलाई दिएको छ ।

लगानी बोर्डको समन्वयमा सतलज र सडक विभागबीच उक्त सडक निर्माण गर्ने समझदारीपत्र (एमओयु) मा मंगलबार हस्ताक्षर भएको छ । समझदारीपत्रमा विभागका तर्फबाट कोसी कोरिडोर सडक आयोजनाका प्रमुख गोपाल सिग्देल र सतलजका तर्फबाट अरुण तेस्रो आयोजनाका प्रमुख कार्यकारी अधिकार रोशनलाल नेगीले हस्ताक्षर गरेका छन् ।

विभाग र सतलजबीच एक वर्षभित्रै सडक निर्माण गरिसक्ने समझदारीसमेत भएको छ । प्रवेश मार्ग बनेपछि उक्त आयोजनाको निर्माण कार्य सुरु हुनेछ । विभागलाई प्रवेश मार्ग निर्माणको जिम्मा दिएपछि १ खर्ब ४ अर्ब रुपैयाँ लागतको विदेशी लगानीको ठूलो आयोजना बन्ने सुनिश्चित भएको लगानी बोर्डका अधिकारीहरू बताउँछन् ।

विश्वव्यापी प्रतिस्पर्धाबाट छानिएको सतलजले आयोजना निर्माण गरेपछि उत्पादित कुल बिजुली २१.९ प्रतिशत अर्थात् १ सय ९७ मेगावाट नेपाललाई नि:शुल्क दिने छ । सतलजले सन् २०२१ मा अरुण तेस्रो आयोजना सम्पन्न गर्ने लक्ष्य राखेर काम अघि बढाइरहेको छ ।

उत्पादन सुरु भएको २५ वर्षपछि उक्त आयोजना सतलजले नेपालले चालू हालतमा फिर्ता गर्ने छ । २५ वर्षको अवधिमा नेपालले उक्त आयोजनाबाट ३ खर्ब ४८ अर्ब रुपैयाँ लाभ प्राप्त गर्ने छ भने २५ वर्षपछि उक्त आयोजना नेपालको स्वामित्वमा आउने छ ।

समझदारीपत्रअनुसार विभागले कोसी कोरिडोरको छ्याङखुटीबाट अरुण तेस्रो आयोजनास्थलसम्म प्रवेश मार्ग निर्माण गर्ने छ । करिब ५२ किलोमिटर लामो सडक निर्माणको सम्पूर्ण खर्च भने सतलज कम्पनीले बेहोर्ने छ ।

विभागका महानिर्देशक माधव कार्कीले विभागले छ्याङखुटीबाट अरुण तेस्रो आयोजनास्थलसम्म ५.५ मिटर चौडा कालोपत्रे सडक (सहायक राजमार्गस्तरको) निर्माण गर्ने छ । भारतबाट प्राविधिक ल्याएर सडक बनाउन महँगो र बढी समय लाग्ने भएकाले छिटो बनाउन विभागलाई दिइएको जानकारी स्रोतले दिए ।
उनका अनुसार सतलजले आयोजना र प्रवेश मार्ग निर्माणको विस्तृत इन्जिनियरिङ अध्ययन प्रतिवेदन (डीपीआर) तयार गरिसकेको छ ।

विभागले तीन महिनाभित्र डीपीआरको पुनरावलोकन गरी सडक निर्माणको खाका, लागत र लाग्ने प्रस्ताव गर्ने छ । तीन महिनापछि सतलज र विभागबीच सडक निर्माणका लागि अन्तिम सम्झौता भई काम अघि बढ्ने छ ।

सतलजले सडक विभागमार्फत सडक निर्माण कार्य अघि बढाउन लगानी बोर्डसमक्ष प्रस्ताव गरेको थियो । बोर्डको आग्रहमा विभागमा उक्त सडक निर्माण गर्न राजी भएको हो ।

सतलजले सडक निर्माणको जिम्मा विभागलाई दिनु आयोजना विकास सम्झौता (पीडीए) समेत भइसकेको अरुण तेस्रो आयोजनाको निर्माण कार्य अघि बढ्ने दिशामा कोसेढुंगा भएको बोर्डका अधिकारी बताउँछन् । ‘सतलजले सडक निर्माणको जिम्मा विभागलाई दिएपछि अरुण तेस्रो आयोजना निर्माण हुने सुनिश्चित भएको छ,’ ती अधिकारीले भने ।