पुस २२, २०७२- दाङको घोराही–तुलसीपुर सडकखण्डमा बुधबार बिहान माइक्रो र स्कुल बस एक आपसमा ठोक्किएर भएको दुर्घटनामा मृत्यु हुनेको संख्या ७ पुगेको छ । २३ जना घाइते भएका छन् ।

तुलसीपुरबाट घोराहीतर्फ जाँदै गरेको रा१ज ३७२ नम्बरको किया गाडी र घोराहीबाट विद्यार्थी लिन नारायणपुरतर्फ जाँदै गरेको घोराहीस्थित पद्मोदय पब्लिक उच्च माविको रा१क १९१ नम्बरको बस त्रिपुर नगरपालिका–३ को सौंरीकुलानजिक एकआपसमा ठोक्किँदा किया गाडीका चालक सहित घटनास्थलमै ५ यात्रुको मृत्यु भएको थियो ।

मृतकमध्ये किया गाडीका चालक दाङ मानपुरका धनबहादुर थापा, यात्रुहरु नारायणपुरका २६ वर्षीय सवनम अन्सारी र सल्यान काभ्राका डेढ वर्षका हेमन्त विष्टको नाम खुलेको छ । मृतक दुई महिलाको नामखुल्न सकेको छैन । गम्भीर घाइते १२ जनालाई नेपालगञ्ज रिफर गरिएको थियो । ती मध्ये उपचारको क्रममा दुई जना महिलाको नेपालगञ्जमा मृत्यु भएको छ । उनीहरुको पनि सनाखत हुन सकेको छैन ।

अन्य घाइतेहरुको घोराहीस्थित राप्ती उपक्षेत्रीय अस्पतालमा उपचार भइरहेको दाङका प्रहरी प्रमुख एसपी कुवेर कडायतले जानकारी दिए ।

बिहान हुस्सु लागेका कारण सडक राम्ररी नदेखिँदा र किया गाडी तिव्र गतीमा रहेका कारण दुर्घटना भएको हुनसक्ने प्रहरीको आशंका छ । किया गाडीमा क्षमताभन्दा बढी यात्रुहरु रहेको प्रहरीले जनाएको छ ।