व्यवस्थापिका संसद्को विकास समिति बैठक
व्यवस्थापिका संसद्को विकास समितिले उत्तरी सीमा जोड्ने प्रमुख सडकहरुको ट्रयाक खोल्ने तथा स्तरोन्नति गर्ने काममा नेपाली सेनालाई संलग्न गराउन सरकारलाई निर्देशन दिएको छ।
समितिले बुधबार उपप्रधानमन्त्री तथा रक्षामन्त्री भिम रावल, विभिन्न मन्त्रालयका सचिव र नेपाली सेनाका उच्च अधिकृतहरुलाई बोलाएर छलफल गरी विभिन्न स्थानका सडक निर्माणमा नेपाली सेनाले गरेको कामको प्रसंशासहित उत्तरी नाका जोड्ने प्रमुख सडकहरुको ट्रयाक खोल्ने तथा स्तरोन्नतिको काममा सेनालाई संलग्न गराउन निर्देशन दिएको हो।
सेनालाई सहभागी गराउँदा काम द्रुत गतिमा अघि बढ्ने समितिको भनाइ छ।
सरकारले एक महिना पहिले चीन जोड्ने मैलुङ -स्याफ्रुवेसी सडकको ट्रयाक खोल्ने जिम्मा नेपाली सेनालाई दिएको थियो । समितिले काठमाडौदेखि रसुवागढी जोड्ने सडकमा एकद्वार प्रणालीबाट फाष्ट ट्रयाकमा काम गर्न सरकारलाई निर्देशन दिएको छ। भारतले लगाएको नाकाबन्दीबाट पाठ सिकी इन्धन र अन्य वस्तुको सहज आपूर्तिका लागि रसुवागढी जोड्ने सडकलाई उच्च प्राथमिकता दिएर फास्ट ट्रयाकमा काम गर्न सरकारलाई निर्देशन दिएको हो । समितिले फाष्ट ट्रयाकमा काम गर्ने विस्ततृ कार्ययोजना समेत मागेको छ।
बैठकमा अर्थ मन्त्रालयका बजेट महाशाखा प्रमुख बैकुण्ठ अर्यालले सडक निर्माणमा बजेटको अभाव हुन नदिने तर कति बजेट चाहिन्छ भनेर भौतिक पूर्वाधार मन्त्रालयले समयमा नै भन्नुपर्ने बताए।
बैठकमा नेपाली सेनाका सहायकरथी उद्धव विष्टले नेपाली सेनाले हालसम्म विभिन्न स्थानमा ११ सय ७८ किलोमिटर सडकको ट्रयाक खोलिसकेको जानकारी गराएका थिए। सेनाले अहिले जाजरकोट—डोल्पा सडक खण्ड, कालिगण्डकी करिडोर, कर्णाली करिडोर लगायतका स्थानमा ३ सय ४८ किलोमिटर सडकको ट्रयाक खोल्ने काम गरिरहेको छ । सेनासँग २१ वटा पुल बनाएको अनुभव पनि छ ।
setopati