पुस १८, २०७२- महत्त्वकांक्षी ‘चलचित्र नगरी’ निर्माणस्थल डाङ्डुङे डाडाँबारे प्रधानमन्त्रीको अभिव्यक्तिपछि चलचित्र जगतलाई भन्दा बढी राजनीति जगतलाई तताएको छ ।

प्रधानमन्त्री केपी शर्मा ओलीले बिना सन्दर्भ नेपालकै पहिलो चलचित्र नगरी निर्माणस्थलबारे नजरअन्दाज गरिदिएपछि यो प्रसंगले राजनीतिक पाटोमा प्रवेश पाएको हो । यो विषयलाई लिएर दोलखाको कांग्रेस पार्टीले सत्ताको विरोध गर्ने गतिलो मसला ठानेको देखियो ।

शुक्रबार संविधानबारे प्रचारात्मक कार्यक्रममा आएका संस्कृति, पर्यटन तथा नागरिक उड्ययन मन्त्रीको गाडी रोकेर असान्दर्भिक आन्दोलन गर्‍यो ।

प्रधानमन्त्रीको पुत्ला जलाएको र मन्त्रीलाई कालो झण्डा देखाएको विषय राजनीतिक प्रदर्शनको अधिकार ठानिन्छ, हातमा चिर्पट लिएर गाडी रोक्न जानु अशान्तिपूर्ण प्रदर्शनको संकेत हो । जुन चरित्रले दोलखामा चलचित्र नगरी बनाउने दवाव भन्दा सत्ताविरोधी राजनीतिको खेतीमा परिणत गर्‍यो ।

सामुदायिक बनले उपलब्ध गराएको १५ सय रोपनी क्षेत्रफल र डाङडङ्गे डाँडाको हजारौं रोपनी क्षेत्रको वातावरणले विश्वकै सर्वाधिक आकर्षणस्थलमा चलचित्र नगरी बन्न लोगेको पुष्टि हुन्छ । काठमाडौं उपत्यकाबाट बाहिरिएपछिका हर दृष्यहरु फिलिम सुटिङका लागि उपयुक्त छन् । प्राकृतिक बरदान ठानिने हिमाल, खोला, झरना, हिमपात, डाँडाकाडा, जंगल, बन्यजन्तु, गाउँवस्ती, मानिसका रहनसहन र संस्कृतिहरु चलचित्रका आकर्षक दृष्यहरु हुनसक्छन्, जुन दोलखाको हरस्थलमा पाउन सकिन्छ । यिनै कारणले दोलखाको सहि सुन्दरताको मूल्याङ्कन स्वीस विकासविद्ध स्वर्गीय टोनी हेगनले गरिदिएका थिए । नेपालका दिग्गज चलचित्रकर्मीहरुले गरिरहेकै छन् । त्यसैले डाङ्डुङेमा चलचित्र नगरीको प्रस्ताव भएको हो । जसलाई दोलखाली जनता र सरकारले अनुमोदन गरेर कार्य अगाडि बढिसकेको छ । जिल्ला विकास समिति, गाउँ विकास समिति र सरकारले पनि खर्च गर्न थालेको उक्त आयोजनाप्रति प्रधानमन्त्रीको अनुदारपूर्ण अभिव्यक्ति साच्चिकै दु:खदायीपूर्ण छन् ।’

चलचित्र उद्यमले पाउने विरलै यस्ता प्रकृति दृष्यहरुले भरपुर क्षेत्रका बारेमा प्रधानमन्त्रीले बिना जानकारी बताउनु उनको कार्यक्षमतामाथिको प्रश्नचिन्ह पनि हो । हुन त आफ्नो गृह जिल्ला आएका बेला विपक्षीको अबरोधको सामना गर्नु परेका मन्त्री आनन्दप्रसाद पोखरेलले प्रधानमन्त्रीको भनाइको खण्डन गर्दै दोलखामै चलचित्र नगरी बन्ने विश्वास दिलाए । सरकारको तर्फबाट डाङ्डुङ्गे डाँडामै चलचित्र नगरी बनाउने यसैवर्ष २ करोड बजेट दिने वाचा उनले गरे । एमाले पोलिटव्युरो सदस्य एवं सांसद् पशुपति चौलागाईं र एमाले केन्द्रीय सदस्य पार्वत गुरुङले पनि प्रधानमन्त्रीको भनाइको बचाउ गर्दै फिल्मसिटी बाहिर नजाने जिकिर गरे ।

चलचित्र विकास बोर्डले प्रस्ताव गरेर सरकारले कार्य अगाडि बढाइसकेको यो विषयलाई यसअघिको सरकारले पनि छायामा राख्न खोजेको थियो । यसका अभियन्ता कलाकार मदनदास श्रेष्ठ, दोलखाका ३ जना सांसद् पशुपति चौलागाईं, आनन्दप्रसाद पोखरेले र पार्वत गुरुङ एवं केही उद्यमीहरुले पूर्वसञ्चारमन्त्री मिनेन्द्र रिजाललाई ‘चलािचत्र स्टुडियो’को फाइल अगाडि बढाउने आग्रह गर्दा प्रतिकात्मक उत्तर आएको थियो । सञ्चारमन्त्री रिजालले अलमलपूर्ण अभिव्यक्ति दिदँै घुमाउरो भाषामा डाङ्डुङेमा चलचित्र नगरीको स्वरुप दिन नसकिने नै बताएका थिए ।

दोलखावासीको गर्वको यो विषयलाई तोडमोड गर्दै सरकारका प्रधानमन्त्री र मन्त्रीहरुको कानमा डाङ्डुङे डाँडाप्रति अदृष्य ढंंगले नकरात्मक चेतना भरिदिने काम भइरहकै देखिन्छ । जुन स्थानलाई वातावरणीय प्रभाव मूल्याङ्कनले पनि चलचिात्र नगरीका लागि उपयुक्त ठानेको छ । यस्ता भ्रमहरु हटाउन दोलखावासीहरु जुटेर यथार्थ प्रचार गर्नका लागि एकजुट हुन हितकर छ ।