काठमाडौं, पुस १८ – पूर्व प्रधानमन्त्री डा. बाबुराम भट्टराई २०७२ सालभित्रमै आफ्नो नयाँ शक्ति अभियानलाई राजनीतिक पार्टीमा रुपान्तरण गर्ने जानकारी दिनुभएको छ ।
रिपोर्टर्स क्लब नेपालका अध्यक्ष ऋषि धमलाले बुझाएको ज्ञापन पत्र बुझ्दै भट्टराईले नयाँ शक्तिलाई राजनीतिक पार्टीमा रुपान्तरण गर्न अहिले आफू सबै पक्षसँगको छलफलमा रहेको जानकारी दिनुभयो । आर्थिक विकासमा राजनीतिक हस्तक्षेप गर्न पनि पार्टीको रुपमा रुपान्तरण हुनु पर्ने उहाँले बताउनुभयो ।
‘देशको आर्थिक विकासमा राजनीतिक रुपमा हस्तक्षेप नगरे त्यो अघि बढ्न सक्दैन’ भट्टराईले भन्नुभयो ‘नयाँ पार्टीले बैकल्पिक शक्तिको रुपमा भ्रष्टाचार मुक्त भएर आर्थिक विकास र समृद्धिको लागि काम गर्छ ।’
सीमांकनमै मुल समस्या
समानुपातिक समावेशीता र जनसंख्याको आधारमा निर्वाचन क्षेत्र निर्धारण गर्ने बारेमा दलहरुबिच मोटामोटी सहमति बनिसकेको उल्लेख गर्दै मुल समस्या सीमांकनमा रहेकोले अहिले नै सहमति गरेर गए राम्रो हुने बताउनुभयो ।
सीमांकनमा धेरै छलफल भईसकेकोले यसलाई तत्काल टुङग्याउँदा राम्रो हुने भन्दै उहाँले नभए मधेस आन्दोलन राजनीतिक दलको हातबाट अरु तिर जाने खतरा औंल्याउनुभयो । ‘सीमांकन तत्काल टुङग्याउँदा राम्रो हुन्छ’ उहाँले भन्नुभयो ‘त्यसो गरे झगडाको बिऊ बाँकी रहँदैन ।’
पहिलो संविधानको राज्य पुनर्संरचना तथा राज्य शक्तिको बाँडफाँड समिति र सरकारले गठन गरेको राज्य पुनर्संरचना आयोगको प्रतिवेदनको वरिपरि रहेर सींमाकनमा समाधान खोजे समाधान हुन सक्ने उहाँको भनाई छ ।
भारतसँगको कटुता तत्काल अन्य गरेर सम्बन्ध सुधार गर्नु पर्ने आवश्यकता औल्याउँदै उहाँले भारतसँगको सम्बन्धमा केही समय अवरोधमात्रै भएको उल्लेख गर्नुभयो ।
डा. भट्टराईले नेपालको राजनीतिक अवस्थिती विशिष्ट किसिमको भएको भन्दै दुई विश्वको आर्थिक महाशक्ति हुने तरखरमा रहेकोले नेपाल दुई देशवीचको गतिशिल पुल बनेर विकासमा अघि बढ्नु पर्ने बताउनुभयो ।
ujyaaloonline
