दीपक भट्ट
रामेछाप, पुस १८ – वैशाखको भूकम्पले घर भत्किएको भन्दै घर नै नभत्किएकाले समेत अस्थायी आवासको लागि सरकारले दिएको १५ हजार रुपैयाँ लिएका रामेछापका गैरभूकम्प पीडितले धमाधम रकम फिर्ता गर्न लागेका छन् ।
जिल्ला प्रशासन कार्यालयले पटक पटक सरकारी मापदण्ड विपरीत रकम लिनेलाई कानुनी कारवाही अगाडी बढाउने भन्दै सार्वजनिक सुचना प्रकाशित गरेसँगै नियम विपरीत रकम लिने गैरभूकम्प पीडितले धमाधम रकम फिर्ता गर्न लागेका हुन् ।
गैरभूकम्प पीडितले लिएको रकममध्ये आठ जनाले १५ हजार रुपैयाँका दरले एक लाख २० हजार रुपैयाँ राष्ट्रिय वाणिज्य बैंकमा रहेको प्रधानमन्त्री दैवी प्रकोप उद्धार कोषको खातामा जम्मा गरेको जिल्ला दैवी प्रकोप उद्धार समितिका अध्यक्ष एवं रामेछापका प्रमुख जिल्ला अधिकारी शेषनारायण पौडेलले जानकारी दिनुभयो ।
भूकम्पले घर नै नभत्किएकाहरुले समेत राज्यले प्रदान गरेको अस्थायी आवासको रकम लिएको भन्दै जिल्ला प्रशासन कार्यालयमा झण्डै एक हजारको हाराहारीमा उजुरी दर्ता भएका छन् । जसअन्तर्गत जिल्ला प्रशासन कार्यालयले ती उजुरी माथी छानविनको प्रक्रिया अगाडी बढाएको छ ।
उजुरी सावित भएमा अस्थायी आवासको लागि लिएको रकम फिर्ता गराउने र आवश्यक कारवाही अगाडी बढाउने र राज्यबाट दिइने सबै सुविधाहरु रोक्ने तथा भूकम्प पीडितको नाममा गैरभूकम्प पीडितले लिएको सुविधाको बारेमा सञ्चारमाध्य मार्फत नामावली प्रकाशन गर्नेसम्मको काम अगाडी बढाउने सुचना सार्वजनिक गरेसँगै अहिले रकम फिर्ता गर्छु भन्ने धेरै नागरीकहरुले टेलिफोन मार्फत जानकारी दिएको समेत प्रजिअ पौडेलले बताउनुभयो ।
ujyaaloonline
