काठमाडौं: एमाओवादीका पोलिटब्युरो सदस्य हेमन्तप्रकाश ओली ‘सुदर्शन’ले पार्टी परित्याग गरेको घोषणा गरेका छन्।
शुक्रबार संवाद डबलीमा पत्रकार सम्मेलन गरेर नेता ओलीले नवधनाढ्यको बहुमत भएकाले एमाओवादीमा इमानदार नेताकार्यकर्ता बस्नुको अर्थ नभएको भन्दै पार्टी परित्याग गरेको घोषणा गरेका हुन्। ‘एमाओवादी नेतृत्व नवधनाढ्य वर्गमा परिणत भइसकेको छ। अब त्यहाँ बसेर देश, जनता र समाजका लागि सेवा गर्ने नसक्ने भएकाले मैले आजको मितिबाट स्वतन्त्र भएको घोषणा गरेको छु’, नेता ओलीले भने।
एमाओवादीका अध्यक्ष पुष्पकमल दाहालको पछिल्लो राजनीतिक दस्ताबेजपछि एमाओवादीसँग आफ्नो मोहभंग भएको बताउँदै नेता ओलीले भने, ‘दाहालजीको पछिल्लो राजनीतिक दस्ताबेजपछि अब पक्का भएको छ उनी काल्पनिक समाजवादी हुन्।’
यो संविधानको कार्यान्वयन गरेर समाजवाद ल्याउने दाहालका कुरा काल्पनिक भएको उनले बताए। आफूलाई पार्टीभित्र कुरा राख्ने मौका नै दिएको नेता ओलीले पत्रकार सम्मेलनमा बताए।
उनले जनयुद्धले विकास गरेको विचारलाई दाहालले आफ्नो पैत्रिक सम्पत्तिजस्तै विचारलाई एकपछि अर्को छोड्दै गएकाले माओवादी विघटनतिर गएको बताए।
एमाओवादीमा भ्रष्ट नेताहरूको आफूले पोल खोल्ने बताउँदै ओलीले बोगटी र शेरचन आयोगको प्रतिवेदन सार्वजनिक गर्ने बताए। ओलीले मोहन वैद्य र नेत्रविक्रम चन्द विप्लवले अगाडि सारेका कार्यदिशाको अध्ययन गरेर निर्णयमा पुग्ने बताए।
‘आज म तपाईंहरूमार्फत इतिहासका निर्माता आदरणीय जनममुदायसमक्ष एमाओवादी समूहका नाममा मुद्दा दायर गर्न चाहन्छु। आफ्नो रगतपसिनाको एउटा अध्यायको अन्त्य भएको र अर्को अध्याय सुरु भएको घोषणा पनि तपार्इंहरूमार्फत गर्न चाहन्छु’, नेता ओलीद्वारा जारी विज्ञप्तिमा उल्लेख छ।
annapurnapost
