लोकप्रिय सामाजिक सञ्जाल फेसबुकले नयाँ सेवा सुरु गर्ने भएको छ। यो सेवाले प्रयोगकर्तालाई विभिन्न सहरका साना व्यवसायलाई सूचीकृत गर्दै त्यसको समीक्षा पनि उपलब्ध गराउने भएको छ।
यसअघि गुगल र येल्पले यो सेवा उपलब्ध गराउँदै आएका छन्। डेक्सटप र ल्यापटपमा फेसबुक चलाउँदा पाइने यो सुविधाले प्रयोगकर्ताले साना पसल, रेस्टुरेन्ट, क्लिनिक, ट्राभल एजेन्सी, होटेल, पर्यटकीय स्थल, चलचित्र हल, सपिङ मलजस्ता स्थानको बारेमा सजिलोसँग जानकारी हासिल गर्न सक्छन्।
फेसबुकले विभिन्न ८५ किसिमका व्यवसायको बारेमा जानकारी दिन सूची तयार गरेको छ । फेसबुकमा अहिलेसम्म पाँच करोडभन्दा बढी व्यवसायको सूची बनिसकेको छ। यसमा प्रयोगकर्ताको रिभ्यु पनि उपलब्ध छ।
यो सेवाले गुगल र येल्पलाई टक्कर दिने विश्लेषण गरिएको छ । प्रयोगकर्ताले व्यवसायको बारेमा जानकारी, उपभोक्ताको लागि खुला रहने समय, लोकेसन म्याप तथा प्रयोगकर्ताको समीक्षा पढ्न पाइन्छ।
गुगलले दशकअघि नै यो सेवा सुरु गरेको थियो। सर्च इन्जिनमा एक छत्र राज गरेको गुगलको एडवड्र्स नामको यो सेवामाथि अरूले चुनौती दिन आँट गरेका थिएनन्।
गुगलले यो सेवा सुरु गर्दा नेटस्केप नेभिगेटर र इन्टरनेट एक्स्प्लोरर यसका प्रतिद्वन्द्वी थिए । तर, गुगललाई यसले असर पुर्याउन सकेनन् । अब फेसबुकले यो सेवा सुरु गरेपछि गुगललाई प्रभाव पार्न सक्ने बताइएको छ।
गुगलको एड्वर्डसले अहिलेसम्म नयाँ कम्पनीलाई बजारमा छिर्न दिएको थिएन। तर, बजार विस्तारसँगै यो सेवामा सूचीकृत व्यवसायको संख्या पनि बढ्दै गइरहेको छ।
त्यसैले गुगललाई त्यति असर नपार्ने पनि सम्भावना छ । फेसबुकको यो सेवाले अर्को कम्पनी येल्पलाई पनि असर पार्न सक्छ । येल्प युरोप र अमेरिकाका केही देशमा प्रख्यात छ।
एजेन्सी