सुर्खेत, पुस १७ – जिल्ला वन कार्यालय सुर्खेतले लोपोन्मुख अवस्थामा रहेको डंगुर (हिमालयन ग्रिसन) जातको गिद्ध विरामी अवस्थामा फेला परेको जानकारी दिएको छ ।
कार्यालयले वीरेन्द्रनगर ८ इत्राममा रहेको शंकरचोक नजिकै औषधीले लठिएको अवस्थामा फेला परेको गिद्धको अहिले उपचार भैइरहेको जनाएको छ ।
मुखवाट फिज फालिरहेको अवस्थामा गिद्ध फेला परेको जानकारी स्थानीय वासिन्दाले दिएपछि विश्वकै दुर्लभ मानिएको गिद्धलाई तुरुन्त उद्धार गरी उपचार थालिएको जिल्ला वन अधिकृत हेमराज विष्टले बताउनुभयो ।
उहाँले विषाधी खाएका पशुको सिनो खाएका कारण गिद्ध विरामी भएको हुन सक्ने जानकारीसमेत दिनुभयो । पशु चौपायलाई किसानले डाइक्लोफिनाक नाम गरेको औषधी खुवाउने भएकोले त्यस्ता चौपायको सिनो खाँदा किड्नी फेल भएर गिद्ध मर्ने गरेको विष्टले उल्लेख गर्नुभयो । औषधीका कारण यो जातको करिव ९९ प्रतिशत गिद्ध लोप भईसकेको जिल्ला बन अधिकृत विष्टले दावी गर्नुभयो ।
विरामी अवस्थामा फेला परेको आधामिटर अग्लो गिद्ध अहिले सन्चो हुदै गएकोले निको हुन वित्तिकै २/३ दिनभित्रै छाडिने उहाँले जानकारी दिनुभयो ।
औषधी हालेको सिनो खाएका कारण सवै जातका ९० प्रतिशत गिद्ध लोप भएपछि पछिल्लो समय सरकारले गिद्ध संरक्षणको लागि विभन्न कार्यक्रम गर्दै आएको छ । लोपोन्मुख अवस्थामा रहेको गिद्ध संरक्षणको लागि गैरसरकारी संघसंसस्थाहरु पनि जुटिरेका छन् ।
ujyaaloonline
