युवराज पुरी
फोटो :फाइल फोटोजनसरकारको मन्त्रिमण्डल पनि बनाइयो
सिन्धुपाल्चोक : नेत्रबिक्रम चन्द नेतृत्व माओवादीले शान्ति प्रकृयाको थालनीसँगै तत्कालीन नेकपा माओवादीले विगठन गरेको जनसरकार व्युताउँन थालेको छ ।
सशस्त्र द्वन्द्वका बेला समानान्तर सरकारका रुपमा तत्कालीन माओवादीले जनसरकार गठन गरेकै शैलीमा चन्द नेतृत्व माओवादीले जनपरिषद नाम दिएर जनसरकार व्युताउँन थालेको हो ।
राजधानीमा भेला गरेर केन्द्रीय जनपरिषद घोषणा गरेपछि जिल्ला र राज्यतहमा समेत जनपरिषद नाम दिएर समानान्तर सरकार गठन गर्न थालेको नेकपा माओवादी स्रोतले जनाएको छ ।
राजधानीमा भएको भेलामै जनसरकारको जिल्ला संयोजक समेत चयन भइसकेका छन् । जनप्रतिनिधि सभाको ठाउँमा विप्लव माओवादीले जन परिषद राखेको छ ।सिन्धुपाल्चोक जनपरिषदको संयोजकमा किरण घिमिरे चुनिएको जिल्ला पार्टीले जनाएको छ ।
तत्कालका लागि जिल्ला संयोजक मात्र चुनिएको पार्टीका जिल्ला सेक्रेटरी कमल माझीले बताए ।
‘अहिलेलाई पार्टीको केन्द्रीय भेलाले सयोजक मात्रै चुनेको छ,’ माझीले भने, ‘अब छिटै जिल्ला जनपरिषदलाई पूर्णता दिएर गाउँ तहमा संरचना विस्तार गर्नेछौं ।’ भेला मंसिर ८ गते राजधानीमा भएको थियो ।
संसदीय व्यवस्था स्वीकार्नेहरुले मुलुकको समसप्रत बेवास्ता गरेकाले पार्टीले समानान्तर सरकारको रुपमा जनपरिषद गठन गरेको माझीले स्वीकारे ।
‘संसदवादी दलले जनताको वेवास्था गरेकाले जनताको प्रतिनिधिको रुपमा तल्लो तहसम्म छुट्टै सरकार बनाउन लागेको हो,’ माझीले भने ।
गाउँ र नगरमा समेत जनपरिषदको बिस्तार गर्ने माझीले जानकारी दिए । सर्वसाधारणको हितका लागि जनपरिषद परिचालित हुने माझीको दाबी छ ।
छिटै वडा र गाउँस्तरको समिति निर्माण गर्न लाग्ने जिल्ला संयोजक किरण घिमिरेले बताए । जिल्लासँगै प्रदेशस्तरको समितिसमेत गठन हुन थालेको छ ।
बिहीबार काभ्रेमा ताम्सालिङ राज्य जनपरिषदको घोषणा भएको थियो । तत्कालीन माओवादीले ताम्सालिङ राज्य मानेको क्षेत्रलाई समेटेर गठन गरिएको समितिको सभामुखमा हरिमाया तामाङ तथा मुख्यमन्त्रीमा माणिक लामा चुनिएका छन् ।
भेलाले २५ जनाको मन्त्रीमण्डल गठन गरेको सिन्धुपाल्चोकबाट सहभागी कार्यकर्ताले जानकारी दिए ।
annapurnapost
