फोटो :फाइल फोटो
काठमाडौँ : प्रहरी प्रधान कार्यालयले १६ जना एसपी र ३२ जना डिएसपीको एकसाथ सरुवा गरेको छ ।
सरुवामा मधेसमा आन्दोलन चर्केका जिल्लाका प्रमुखहरु पनि परेका छन् । प्रहरी प्रधान कार्यालयले सुनसरी प्रहरी प्रमुखमा ट्राफिक महाशाखाका एसपी पोषराज पोखरेललाई पठाएको छ ।
मधेस आन्दोलन चर्किएको मध्यतराईको बारामा एसपी नरेन्द्र उप्रेतीलाई पठाइएको छ । त्यसैगरी गोविन्द साह काठ तस्करीको विवादमा परेर हेडक्वार्टर तानिएपछि उनको स्थानमा नरबहादुर खत्रीलाई पठाइएको छ ।
प्रहरी प्रधान कार्यालयले मधेस आन्दोलन चर्को अर्को जिल्ला नवलपरासीमा राजेन्द्र चौधरीलाई पठाएको छ ।
एसपी प्रकाशजंग कार्कीलाई अपराध महाशाखामा ल्याइएको छ । प्रहरी प्रधान कार्यालयले ३२ डिएसपीहरुको पनि सरुवा गरेको छ ।
दरबारमार्ग वृत्तमा डिएसपी कृष्णबहादुर पल्ली मगर र नयाँबानेश्वर वृत्तमा नारायणप्रसाद चिमोरिया आएका छन् ।
दरबारमार्गका डिएसपी रमेशकुमार बस्नेतलाई अख्तियारको पूर्वाञ्चल क्षेत्रीय कार्यालय सुनसरी पठाइएको छ ।
प्रहरी प्रधान कार्यालयले डिएसपी माधव बुढाथोकीलाई सोलुखुम्बु, रञ्जितसिंह राठौरलाई प्युठान, बिश्वराज खड्कालाई म्यादी, रामबहादुर केसीलाई ताप्लेजुङ र रुपेश खड्कालाई रुकुम जिल्लाको प्रहरी प्रमुख बनाइ सरुवा गरेको छ ।
annapurnapost
