१७ पुस, काठमाडौं । केपी ओली नेतृत्वको सरकारको कामकारवाही प्रभावकारी नभएको भन्दै सत्तारुढ एकीकृत नेकपा माओवादीमा असन्तुष्टि बढेको छ ।
एमाओवादी अध्यक्ष प्रचण्डसहितका शीर्ष नेताहरुले सार्वजनिकरुपमा नै ओली सरकारको आलोचना गर्न थालेका छन् । ‘सरकार सञ्चालनमा असफल भइसक्यौं भन्ने निष्कर्षमा त पुगिसकेका छैनौं’ एमाओवादी उपाध्यक्ष नारायणकाजी श्रेष्ठ प्रकाशले अनलाइनखबरसँग भने- तर, समग्र सरकार सञ्चालन र हाम्रै पार्टीले सम्हालेका मन्त्रालयको काममा हामी असन्तुष्ट छौं ।’
एमाओवादीले ओली सरकारमाथि तीनवटा चार्ज लगाएको छ ।
आरोप नम्बर १– सरकारले नाकाबन्दीले उत्पन्न गरेको संकट समाधान गर्न जुन प्रकारको योजनावद्ध पहल गर्नुपर्ने हो त्यो ठीक ढंगले गर्न सकेको देखिएन ।
आरोप नम्बर २– आन्दोलनकारी मधेसी शक्तिहरुसँग गर्ने सरकारकै मुख्य भूमिका हुन्छ, त्यो पनि अहिले टुंग्याउन सकेको छैन । र, त्यसमा सरकार र सरकारमा रहेका शक्तिहरुले मात्र चाहेर कहाँ सकिन्छ भन्ने त सही हो । तर, सरकारको नेतृत्वको तर्फबाट आवश्यक लचकता र पहलकदमी हुनुपर्ने हो । त्यसमा पनि गम्भीरता देखापरेको छैन ।
र, आरोप नम्बर ३– पछिल्लो जुन प्रकारको निर्णय मन्त्रालयहरु टुटाउने, फुटाउने र नयाँ मन्त्रालय थप्ने निर्णय भयो । यो त सहनीय छैन । यसको कुनै औचित्य कसैले पुष्टि गर्न सक्दैन ।
मन्त्रालय फुटाउने प्रस्ताव आउँदा आफ्नो पार्टीमा छलफल भएको भन्दै एमाओवादी उपाध्यक्ष श्रेष्ठले भने, हामीले कुनै पनि हालतमा मन्त्रालय फुटाउने वा थप्ने हुन सक्दैन, कुनै आधार पनि छैन र सन्दर्भले पनि दिँदैन भनेका थियौं । मन्त्रालय फुटाउने वस्तुगत आधार पनि देखिँदैन ।’
श्रेष्ठले अघि भने, भूकम्पपीडित जनता खान नपाएर र जाडोले मरिरहेको अवस्थामा मन्त्रालय विभाजन गर्ने कुरा ठीक हुँदैन भन्यौं । बरु हामीले के भन्यौं भने प्रशासन सुधार आयोगको सिफारिसअनुसार मन्त्रालय घटाऔं र त्यसो गर्दा आनुपातिक रुपमा कति मन्त्री घटाउनु पर्ने हो, त्यसका लागि हामी तयार छौं भनेर भन्यौं । तर, पनि मन्त्रालय फुटाइयो र नयाँ बनाइयो ।’
एमाओवादीले यसलाई सच्याउने र सरकारको काम कारबाही प्रभावकारी बनाउने प्रयास गर्ने बताएको छ । सरकारको नेतृत्व गर्ने प्रधानमन्त्री र एमालेसँग कुराकानी भइरहेको भन्दै श्रेष्ठले भने, हामी त्यो दिशामा सकारात्मक र परिणाम देखिने बनाउन चाहन्छौं । त्यो भएन भने हामी सधैं यो स्थितिमा रहिरहन सक्दैनौं ।’
एमाओवादीले सरकारमा गएका मन्त्रीहरुलाई फिर्ता बोलाउन सक्ने भन्दै मानसिकरुपमा तयार रहन भनेको छ । तर, सरकार ढाल्ने योजना भने नरहको उपाध्यक्ष नारायणकाजी श्रेष्ठ प्रकाशले बताए ।
श्रेष्ठले भने, हामी हेरेर बसिरहने पक्षमा छैनौं । अहिले नै यो सरकार ढाल्ने र अर्को सरकार बनाउने पहल भने हाम्रो छैन । तर, सरकारको अहिलेको कामलाई यहि रुपमा रहन दिएर हामी तमासे बन्न सक्दैनौं ।’
onlinekhabar
