गोरखा । गोरखा सदरमुकाममा रहेको गोरखा बाटलर्सले शुद्व पिउने पानी बजारमा ल्याएको छ ।
गोरखा नगरपालिका–६ को हरमटारीमा स्थापना गरिएको उक्त कम्पनीले १ र २० लिटरको जारमा रहेको पिउने पानी बजारमा ल्याएको कम्पनीका सञ्चालक राम स्वरुप श्रेष्ठले बताए ।
उनका अनुसार पूर्ण स्वचालित मेशिनबाट पानी उत्पादन र प्याकेजिङ गरी बजारमा पठाउन थालिएको हो ।
चाईनाबाट आयात गरिएको उक्त मेशिन सवै स्वचालित भएको सञ्चालक श्रेष्ठले बताए । ‘हामीले बोतल बनाउ मात्र ट्यूवहरु हातले हाल्छौ’ उनले भने ‘बाँकी सबै काम मेशिनले नै गर्दछ ।’
कम्पनीमा आवश्यक विभिन्न प्रकारका बोतलहरु मेशिनमा राखे लगत्तै बोतल सफा गर्ने, बोतलमा पाी भर्ने, बिर्को लगाउने तथा उत्पादन मिति र उपभोग्य मिति सेन्सरले हान्नेदेखी बोतललाई प्याकिङ गर्ने काम समेत स्वचालित रुपमा हुने गर्दछ ।
उनले बजारको माग अनुसार साइज तथा बोतलका प्रकारहरु समेत फरक पर्ने बताए । ‘होटल वा ठूला ठूला प्रतिष्ठानहरुले साना तथा ठूला बोतल तथा बोतलका प्रकार फरक फरक हुने’ भन्दै ‘माग अनुसार नै पानी दिन सकिने गरी मेशिन आयात गरिएको’ उनले बताए ।
प्रति घण्टा २ हजार २०० बोतल उत्पादन क्षमता भएको कम्पनीले पूर्ण क्षमतामा सञ्चालनमा ल्याएको खण्डमा ५२ हजार ८०० तथा बर्षभरीमा ६ लाख ३३ हजार ६०० बोतल पानी अर्थात ५२ हजार ८०० प्याक पानी उत्पादन हुने छ ।
झण्डै १२ करोड लगानी भएको उक्त कम्पनीले मेशिनमा मात्र १ करोड ६५ लाख खर्चेको छ । २ रोपनी १० आना जमिनमा फैलिएको कम्पनीले पानीको गुणस्तरलाई एकै नाश बनाइ राख्न डिपबोरिङ मार्फत आफ्नै जमिनबाट पानी निकालेर प्रशोधन गरेको छ ।
हाल आम्शिक रुपमा सञ्चालनमा आएको कम्पनीले ९ जना कर्मचारीहरुलाई रोजगारी दिएको छ । कम्पनी पूर्ण रुपमा सञ्चालनमा आउनासाथ धेरै कर्मचारीहरुले रोजगारी पाउने पनि सञ्चालक श्रेष्ठले जानकारी दिए ।
कम्पनीले १ लिटरको १२ बोतल रहेको काटुर्नलाई १६५ रुपैयाँ र २० लिटरको जारलाई ४५ रुपैयाँमा बजारमा बिक्री गर्ने लक्ष्य राखेको छ ।
उत्पादिन पानीको बोतल र जारमा प्लाटिकको स्टिकर राखेको कम्पनीले अबको १ महिना भित्रै स्टिकर हटाएर बोतल र जारमा नाम पिन्ट गर्ने गरी तयारी गरेको पनि सञ्चालक श्रेष्ठले बताए ।