गाेरखा । प्रहरीले सिन्धुलीमा एसबीआई बैंक लुटपाट गर्नेहरुलाई पक्राउ गरेर सार्वजनिक गरेको छ । मंगलबार साँझ साढे ७ बजेतिर सिन्धुलीको घ्याङलेख गाउँपालिका–२ हायुटारमा रहेको एसबीआई बैंकको शाखामा लुटपाट भएको थियो ।
प्रहरीले लुटपाटमा संलग्न ७ जनालाई घटनाको ३ दिनपछि पक्राउ गरेर सार्वजनिक गरेको हो । जिल्ला प्रहरी कार्यालय सिन्धुलीले शुक्रबार पत्रकार सम्मेलन गरेर सार्वजनिक गरेको हो ।
पक्राउ पर्नेहरुमा काभ्रे बनेपाका भागवत सिंह थापा, सिन्धुली घ्याङलेखका–२ का ४७ वर्षीय चतुरमान बज्यु, सोहीका ४४ वर्षीय छविलाल स्याङ्ताङ, चितवन भरतपुर–२ का २४ वर्षिय शशंका श्रेष्ठ, नुवाकोटका २३ वर्षीय मिलन गिरी, सोहीका विवेक मगर पक्राउ परेका हुन् । एक जना भने नाबालक रहेकाे प्रहरीले जनाएकाे छ ।
प्रहरीका अनुसार लुटपाट गर्ने समूहले बैंकका सुरक्षा गार्ड रुद्रबहादुर कार्की तथा बैंकका कर्मचारीलाई समेत नियन्त्रणमा राखेका थिए । उनीहरुलाई नियन्त्रणमा लिएर मुखमा टेप बाँधिएको पाइएको थियाे । प्रहरीको प्रारम्भीक अनुसन्धानका क्रममा पक्राउ परेकाहरुले काभ्रेबाट टाटा सुमो जीप बेहुली लिन जाने भन्दै भाडामा लिएर गएको खुलेको छ ।
उनीहरुले बीएडी ०३९८ नम्बरको टाटा सुमो जीप प्रयोग गरेका थिए ।
प्रहरीले चालक भगत सिंह थापालाई पनि नियन्त्रणमा लिएको छ । जिल्ला प्रहरी कार्यालय सिन्धुलीका प्रमुख एसपी लालध्वज सुवेदीका अनुसार बैंकको ३ करोड १० लाख रुपैयाँ लुटपाट भएको हो ।
लुटिएको रकममध्ये १ करोड ८० लाख १० हजार ५०० सय रुपैयाँ बुधबार बिहान नजिकैको जंगलमा फालिएको अवस्थामा बोराभित्र फेला परेको थियो । यो त्यो बाहेक पक्राउ परेकाहरुबाट थप ८३ लाख ३५ हजार रुपैयाँसमेत बरामद भएको प्रहरीले जनाएकाे छ ।
पक्राउ परेकाहरुबाट नक्कली पेस्तोल, लुटपाट गर्न प्रयोग गरिएको लुगाकपडा तथा दुई थान खुकुरी समेत बरामद भएको छ ।
याे लुटपाटकाे मुख्य योजनाकार नै घरधनी भएकाे प्रहरीकाे अनुसन्धानले देखिएकाे छ । प्रहरीका अनुसार लुटिएको एसबीआई बैंकको शाखा घ्याङलेख गाउँपालिका–२ का छविलालको घरमा भाडामा राखिएको थियो । तर, घरधनी छविलाल र सोहीका चतुरमानको योजनामा मंगलबार बैंक लुटिएको खुलेको हो ।