गोरखा । पर्व सुधार गर्ने अभियानमा जुटेका गोरखा सहित केही जिल्लामा भोली दशैँको टिका लगाउने तयारी गरिएको छ ।
पर्व समय सुधार राष्ट्रिय समाज नेपालको आयोजनामा गोरखा, तनहुँ, कास्की, चितवन, काठमाडौं, ललितपुर र भक्तपुरका केही क्षेत्रमा टीका, जमरा लगाएर विजयाँदशमी मनाउन लागेकाे हो ।
ति जिल्लाका केही स्थानमा हिजै देवीको मन्दिरमा पशु बलि दिएर अष्टमी मनाइएको पनि सरकारी स्तरको पर्व सुधार राष्ट्रिय कार्यान्वय समितिका सदस्य सचिव हरी नारायण मल्लले बताए ।
उनका अनुसार तिथी अनुसार आज नमवी र भोली बिजयाँदशमी भएकोले टीका, जमरा लगाएर विजयादशमी मनाइएको बताए ।
‘सरकारी स्तरबाटै पर्वहरुमा सुधार नगरेका कारण समस्या आएको हो’ उनले भने ‘मनु अनुसार प्रत्येक २ हजार बर्षमा १ महिना नघटाउदा चाढपर्वमा बिकृती आएको छ ।’
उनले सरकारले साँस्कृतिक अधिकार हनन् गरेर अपराध गरेको समेत बताए । ‘सरकारले समय सापेक्ष साँस्कृतिक चाडपर्वमा सुधार गर्न सकेन’ उनले भने ‘त्यस कारण पनि हिन्दु सस्कृतीमा बिकृती बढ्न थालेको हो ।’
यता गोरखा जिल्लामा भने भोली गोरखा र पालुङटार नगरपालिका सहित सिरानचोक गाउँपालिका–४, ५ छोप्राक र ६ गाँखुका स्थानीय बासिन्दाले मंगलबार टीका, जमरा लगाएर विजयादशमी मनाउने तयारी पुरा गरेको पर्व समय सुधार राष्ट्रिय समिति नेपाल गोरखाका अध्यक्ष तुलसा मरहट्टाले बताईन ।
भोली विद्यालय तथा गाउँमा सामूहिक रुपमा टीका, जमरा लगाएर विजयादशमी मनाउने तयारी भएको उनले बताईन ।
गोरखामा व्राम्हण, नेवार तथा अन्य जातिहरुले पनि २०६९ सालदेखि पर्व सुधारको सवाल उठाउदै १ महिना अगावै दशैँको टीका लगाउँदै आएका छन् ।
मंगलबार सिरानचोकको छोप्राकको सर्वोदय निमावि, जनज्योति निमावि, धर्मावती मावि, मण्डली मावि, भद्रशीला प्रावि, चित्रेपोखरी मावि, गाँखुको नाम्रुकदेवी निमावि, गोरखा सदरमुकामको बालमन्दिर मावि, महेन्द्र ज्याति माविका विद्यार्थी, शिक्षक र अभिभावक सामूहिक रुपमा टीका, जमरा लगाएर हर्षोल्लासका साथ विजयाँदशमी मनाउने अध्यक्ष मरहट्टाले जानकारी दिइन ।
मंगलबार बिजयाँदशमी मनाउनेहरुले भाद्र ८ गते घटस्थापनाका दिनमा सामूहिक रुपमा जमरा राखेका थिए । टीका, जमरा लगाएपछी भने सामुहिक रुपमा नै भोजभतेर गर्ने गरिन्छ ।
हिन्दू धर्मावलम्बीले मान्ने दशैँ आउन ठीक एक महिना बाँकी छ । त्यो दशैँ पनि उनीहरुले मनाउँछन् ।