गोरखा । नेकपा माओवादी केन्द्रको युवा संगठन योङ कम्युनिस्ट लिग (वाइसीएल) नेपाल गोरखाले बुधबारदेखि गोरखामा श्रम तथा उत्पादन अभियानको औपचारिक सुरुवात गरेको छ ।
गोरखा नगरपालिका–१० र ११ को सिमानामा पर्ने सिर्दि खोलामा तटबन्ध निर्माणको कार्यलाई अघि बढाउँदै अभियानको प्रारम्भ गरेको वाइसीएल नेपालका केन्द्रिय सदस्य एवं गोरखा जिल्ला इन्चार्ज सागर श्रेष्ठले जानकारी दिए ।
अभियानको प्रमुख अतिथि नेपाल कम्युनिस्ट पार्टी (माओवादी केन्द्र)का केन्द्रीय सदस्य एवं गोरखा जिल्ला इन्चार्ज अमर तमुले एक कार्यक्रमका बीच उद्घाटन गरेका थिए ।
उनले श्रम तथा उत्पादन अभियानमा वाइसीएलले स्थानीय युवाहरुलाई जोड्दै जानुपर्ने बताए । आम जनतालाई पनि जोडेर सहभागितामार्फत श्रमदान अभियानलाई सार्थक बनाउनुपर्ने बताउँदै, यस प्रकारका अभियानहरुले विकास र उत्पादनमा टेवा पुग्ने इन्चार्ज तमुले धारणा व्यक्त गरे ।
श्रमदान कार्यक्रममा वाइसीएल गोरखाका जिल्ला समिती, नगरसमिती, विभिन्न वडा, केन्द्रिय जिल्ला स्थित केन्द्रिय समितिका पदाधिकारीलगायत्का युवाहरूको उल्लेख्य उपस्थिति रहेको थियो । सहभागीहरूले सामूहिक श्रमद्वारा खोलामा ढुंगा र बालुवा प्रयोग गरी तटबन्ध निर्माण गर्दै स्थानीय किसानको खेतबारीमा पुग्ने सिंचाइ मार्गलाई सहज बनाउन लागेको हो ।
वाइसीएलले गोरखाका इन्चार्ज श्रेष्ठले पार्टीको नीति अनुरुप गोरखामा पनि वाइसीएललाई श्रम र उत्पादनसँग जोड्न अभियानको थालनी गरेको बताए । यस अभियानलाई निरन्तरता दिने र स्थानीय समस्यालाई सामूहिक श्रमले समाधान गर्ने प्रतिबद्धता ब्यत्त गरे । वाइसीएलले जिल्लाका अन्य वडामा समेत श्रम गतिविधि विस्तार गर्ने योजना बनाएको छ ।
वाइसीएल नेपाल गोरखाद्वारा सुरु गरिएको श्रमदान अभियानले भौतिक संरचना निर्माणमा सहयोग गर्ने नभई, एकता, सहकार्य र उत्पादनमुखी समाज निर्माणमा समेत महत्त्वपूर्ण योगदान दिने अपेक्षा गरिएको छ ।