गोरखा । जिल्ला प्रशासन कार्यालय गोरखाले गएको आर्थिक बर्षमा १३ करोडभन्दा बढी राजश्व आम्दानी गर्न सफल भएको छ ।
कार्यालयले विभिन्न ६ शिर्षकमा १३ करोड २५ लाख २४ हजार ४० रुपैयाँ राजश्व आम्दानी गरेको प्रमुख जिल्ला अधिकारी रामु राज कडरियाँले जानकारी दिए ।
उनका अनुसार सबैभन्दा धेरै राजश्व राहदानी शुल्कबाट आम्दानी भएको छ । प्रशासनले राहदानीबाट मात्रै १३ करोड १६ लाख ४१ हजार ५०० रुपैयाँ आम्दानी गरेको छ ।
कार्यालयले गत आर्थिक बर्षमा ९ हजार ७९८ जनाको ई–पासर्पोट फारम संकलन गरेको थियो भने ११ हजार ८२ जनालाई ई–पासर्पोट बितरण गरेको थियो । कार्यालयले सोही अवधिमा ३४० जनालाई एमआरपी समेत बितरण गरेको थियो ।
तिनै शिर्षकमा गरी कुल २१ हजार २२० जनाको पासर्पोटको काम हुदा ठुलो मात्रमा राजश्व संकलन भएको हो ।
कार्यालयले दोस्रो ठुलो आम्दानी प्रशासनीक सेवा शुल्कबाट पाएको छ । सोही अवधिमा कार्यालयले उक्त कामबाट १४ लाख २६ हजार ४५० रुपैयाँ राजश्व शुल्क उठान सफल भएको देखिन्छ ।
कार्यालयले हालै सार्वजनिक गरेको तथ्यांक अनुसार हातहतियार नविकरण दस्तुर बापत ४ लाख ५२ हजार ५००, न्यायिक दण्ड जरिवाना र जफतबाट २ लाख ३८ हजार ६४० रुपैयाँ, परिक्षा शुल्कबाट १ लाख ५१ हजार ४०० र प्रशासनीक दण्ड, जरिवाना र जफतबाट ४० हजार राजश्व संकलन गरेको प्रजिअ कडरियाँले बताए ।
आर्थिक बर्षको सोही अवधिमा प्रशासनले धरौटी तर्फ ७२ लाख ७१ हजार २२ रुपैयाँ लिएकोमा ४० हजार २५८ रुपैयाँ फिर्ता भएको छ भने १५ हजार धरौटी सदरस्याहा भएर कुल ७२ लाख १५ हजार ७६४ रुपैयाँ बाँकी धरौटी रहेको पनि जिल्ला प्रशासन कार्यालयको लेखा शाखाले जनाएको छ ।