काठमाडाैं । अण्डाको भाउ अहिलेसम्मकै उच्च भएको छ । उत्पादन घटेर मूल्य बढे सगै अहिलसम्मकै उच्च मूल्य कायम भएकाे हो । यससँगै किसानले अण्डाको लागत मूल्य पाएका छन् ।
नेपाल लेयर्स कुखुरापालक सङ्घले विभिन्न फार्महरूले सार्वजनिक गरेको दररेटलाई आधार मानी समर्थन मूल्य तोकेको छ ।
आजैदेखि लागू हुने गरी ठूलो अण्डाको किसानको दररेट प्रतिक्रेट ३० वटाको ५२५ रुपैयाँ कायम गरिएको छ । मध्यमकाे ४९५ रुपैयाँ कायम छ ।
चितवनलाई आधार मानी दररेट तय गरिएको हो । देशका विभिन्न क्षेत्रमा अण्डा पुग्दा बजारको दररेट नयाँ कायम हुन्छ ।
सङ्घका अध्यक्ष विनोद पोखरेलका अनुसार बिक्री मूल्य प्रतिपेटी (७ क्रेट) को ३ हजार ८५५ रुपैयाँ र मध्यमको ३ हजार ६४५ रुपैयाँ कायम गरिएको छ ।
अध्यक्ष पोखरेलका अनुसार यसअघि गएको वर्षको भदौमा ठूलो अण्डाको मूल्य प्रतिक्रेट ५१० रुपैयाँ पुगेको थियो ।
अण्डाको लागत मूल्य प्रतिगोटा १६ रुपैयाँ ५६ पैसा रहेको छ । अण्डा उत्पादनमा संलग्न कुखुराको सङ्ख्या घटेर माग अनुसार आपूर्ति हुन नसक्दा मूल्य बढेको हो ।