गोरखा । उत्तरी गोरखाको धार्चे गाउँपालिकाले मासु उत्पादन गर्ने किसानलाई नगद अनुदान वितरण गरेको छ । चालु आर्थिक वर्ष २०८१-०८२ मा सञ्चालन गरिएको ‘मासुजन्य उत्पादन अनुदान कार्यक्रम’ अन्तर्गत पालिकाभित्रका ६१ जना किसानलाई नगद अनुदान प्रदान गरेकाे हाे ।
किसानहरुले कुल ६ लाख ३०५ रुपैयाँ बराबरको अनुदान रकम प्राप्त गरेकाे गाउँपालिकाका अध्यक्ष लक्ष्मण गुरुङले बताए । “पालिकालाई मासुमा आत्मानिर्भर बनाउन र मासु तथा मासुजन्य उत्पादनका लागि किसानलाई हौसला प्रदान गर्न अनुदान कार्यक्रम सञ्चालन गरिएको हो, उनले भने, ‘‘कार्यक्रममार्फत स-साना पशुपालक किसानले पनि लाभको अवसर प्राप्त गरेका छन् ।’’
कार्यक्रमले मासुजन्य उत्पादन वृद्धि मात्र नभई विस्तारै स्थानीय रोजगारी सिर्जनामा समेत टेवा पुग्ने गाउँपालिका अध्यक्ष गुरुङको भनाइ छ ।
मासुजन्य उत्पादनका आधारमा अनुदान प्राप्त गर्ने किसानहरुले ९०० देखि ५० हजारसम्म नगद अनुदान प्राप्त गरेको गाउँपालिका पशुसेवा शाखाका प्रमुख हर्क कार्कीले जानकारी दिए ।
‘‘अनुदानका लागि किसानको गोठमै पुगेर स्थलगत निरीक्षण तथा नापतौल गरेर अनुदान वितरण गरिएको छ, उनले भने, ‘‘अनुदान कार्यक्रमले किसानहरुमा व्यवसायिक पशुपालनतर्फको आकर्षण बढ्न थालेको छ ।”
गाउँपालिकाले खसीको मासुमा प्रतिकेजी ३०, राँगाको मासुमा १५, बंगुरको मासुमा ४० र बोइलर कुखुराको (३५–४५ दिन उमेरका) प्रति गोटा ७० का दरले नगद अनुदान दिने व्यवस्था गरेको छ । अनुदान प्राप्त गर्ने किसानलाई बैंक खातामार्फत भुक्तानी दिने गरिएको प्रमुख कार्कीले बताए ।
गाउँपालिकाले वडा नम्बर १ का ९ जना, वडा नम्बर २ का २२ जना, वडा नम्बर ३ का १ जना, वडा नम्बर ४ का ३ जना, वडा नम्बर ५ का २ जना, वडा नम्बर ६ का ३ जना र वडा नम्बर ७ का २१ जना किसान लाभान्वित भएका छन् । मासुजन्य उत्पादनमा अनुदान पाएपछि किसानहरु खुशी भएका छन् ।
“पहिलो पटक आफ्नो मेहनतको मूल्य पाइएको छ, स्थानीय किसान हिरामाया गुरुङले भनिन, ‘‘नगद अनुदान कार्यक्रमले हामीजस्ता साना किसानलाई ठूलो हिम्मत मिलेको छ ।”
किसानहरुलाई पशुपालनमा आत्मनिर्भरता र व्यावसायिकता अभिवृद्धि गर्ने योजना सहित गाउँपालिकाले आगामी आर्थिक बर्षका लागिसमेत मासुजन्य उत्पादन अनुदानका लागि बजेट बिनियोजन गरेको छ ।