गोरखा । गोरखामा आज बिहानै परेकाे भारी बर्षाका कारण सदरमुकाम आउने सडक भाँसिएकाे छ । सडक भाँसिदा सहिद लखन गाउँपालिका–७, स्थित ढुङ्गागाढे भन्ज्याङ्ग नजिकै सडक भासिँदा ढुङ्गागाढे–खाब्दी भन्ज्याङ सडक पूर्णरुपमा अबरुद्ध भएको छ ।
सडक भासिँएर दुईतर्फी नै सवारी आवागमन अबरुद्ध भएको वडाध्यक्ष शरण श्रेष्ठले जानकारी दिए । उनका अनुसार गतबर्ष बर्षाले सामान्य क्षति पुगेको उक्त सडक समयमा मर्मत नहुँदा गएरातीको भीषण बर्षाले थप क्षति पुगेको हो ।
सहिद लखन गाउँपालिका प्रवेश गर्ने मुख्य सडक नै अबरुद्ध भएपनि उक्त सडकखण्ड हुँदै आवातजावत गर्ने यात्रुहरु समस्यामा परेका छन् । सडक भासिँएकाले मोटरसाइकल र पैदलयात्रुसमेत जोखिम मोलेर ओहोरदोहोर गर्नुपर्ने अवस्था बनेको छ ।
उक्त सडक पूर्वाधार विकास कार्यालय गाेरखा मार्फत शनिबारदेखि पुनःनिर्माणको काम सुरु गरेको भएपनि बर्षाका कारण निर्माण कार्य प्रभावित भएको छ ।
उक्त सडक भएर सवारी साधनहरु बुंकाेट, नामजुङ, फुजेल हुदै मनकामना आउने जाने गर्दछ ।
तस्बिर : शरण श्रेष्ठ
