गोरखा । नेपाल कम्युनिष्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहालले गोरखा नगरपालिका–१२ स्थित कुन्दुरटार कुमालबस्तीका सहिद तथा वेपत्ता परिवारसंग आज भेटघाट गरेका छन् ।
भेटघाटमा उनले सहिद परिवारसंग पार्टीको सम्बन्ध र सहयोग नपुगेको स्विकार गरेका छन् । उनले पार्टीले गर्नुपर्ने र राज्यको तर्फबाट गर्नु, गराउनु पर्ने कतिपय जिम्मेवारीमा कमजोरी भएको समेत बताए । ‘‘सहिद तथा घाइते परिवारका पिरमर्का, पिडा सम्बोधन गर्नसक्ने जति पार्टी गर्ने र राज्यको तर्फबाट गराउनु पर्ने कुरामा पनि कमी भयो, उनले भने, ‘‘पार्टीले माथिदेखि तलसम्म निरन्तर सहिद, वेपत्ता तथा घाइतेका परिवारसंग सम्पर्क, भेटघाट गरिराख्नुपर्ने थियो भन्ने कुरामा हामीले गम्भीर समिक्षा गरेका छाैं।’’
सहिदहरुको बलिदानबाट देशमा संघीय लोकतान्त्रिक गणतन्त्रको स्थापना भएको भन्दै अध्यक्ष दाहालले सहिद तथा वेपत्ता परिवारप्रतिको जिम्मेवारी पार्टी कहिल्यै नपन्छिने बताए । ‘‘जसको सहादतले देशमा गणतन्त्र, संघीयता, समानुपातिकताको व्यवस्था भएको छ ती योद्धाका परिवारप्रति हाम्रो जिम्मेवारी त्यत्तिकै पुग्दैन्, उनले भने, ‘‘अवदेखि पार्टी केन्द्र, प्रदेश, जिल्ला तथा स्थानीय पार्टी सवैले पनि नियमित भेटघाट गर्ने र उहाँहरुको कुरा सुन्ने निर्णय समेत गरिएको छ ।’’
माओवादीले सञ्चालन गरिरहेको तराई–मधेष जागरण अभियानका क्रममा समेत पार्टीका सवै नेताकार्यकर्ता सहिद तथा वेपत्ता परिवारको घरमा पुग्ने भेटघाट गर्ने गरेको उनको भनाई छ । अध्यक्ष दाहालले सहिद तथा वेपत्ता परिवारका कम्तीमा १ जना सदस्यलाई रोजगारी, शिक्षा, घाइतेहरुको उपचारका लागि पार्टीले पहल गर्दै आएको स्पस्ट पारे ।.
