गोरखा । राष्ट्रिय स्तरको यु–१३ राष्ट्रिय फुटबल प्रतियोगिता आउदो बिहीबारबाट गोरखा सदरमुकाममा हुने भएको छ ।
द ओसन क्लब गोरखाको आयोजनामा हुने उक्त प्रतियोगिता आउदो ०८२ साल बैशाख १ गते सकिने आयोजकले जनाएको छ ।
क्लबले आज टाइसिट सार्वजनिक गर्न आयोजित पत्रकार सम्मेलनमा अध्यक्ष अमित खत्रीले देशैभरका १२ समूहले सहभागिता जनाउने बताए ।
‘गोरखाको गौरव गोरखाको शान युवा फुटबल फुटबल बिकास हाम्रो अभियान’ नारा दिएको प्रतियोगितामा थ्री स्टार क्लब ललितपुर, समाज कल्याण खेलकुद केन्द्र क्लब काठमाडौं, जि एण्ड ए एकेडेमी काठमाडौं र घोडोघोडी फुटबल क्लब कैलालीको सहभागिता रहने छ ।
त्यसका साथै कटारी टाईगर फुटबल क्लब उदयपुर, नव जागृती भेट्रान्स क्लब सिमरा, पटिहानी फुटबल क्लब चितवन, नारायणगढ फुटबल क्लब चितवन, हिल्ली फिल्डर्स गोरखा एफ सी, द ओल्ड क्यापिटल मावि रानिबन गोरखा, लक्ष्मी सामुदायिक शिक्षा सदन लक्ष्मी बजार गोरखा र आयोजक द ओसन क्लबको समेत प्रतियोगितामा सहभागिता रहने अध्यक्ष खत्रीले जानकारी दिए ।
प्रतियोगिता लिगकम नकआउटको आधारमा खेलाईने छ । ५ दिनसम्म चल्ने प्रतियोगितामा प्रतियोगिहरु बिच कुल ३९ खेल हुने छ । एउटा समूहले कम्तीमा पनि ५ खेल खेल्ने पनि पत्रकार सम्मेलनमा जानकारी दिईएको थियो ।
प्रतियोगितामा बिजेतालाई रनिङ ट्रफी सहित २५ हजार नगदका साथ मेडल र प्रमाण पत्र उप बिजेतालाइ १५ हजार नगदका साथै मेडल र प्रमाण पत्र प्रदान गरीने आयोजकले जनाएको छ ।
सोही प्रतियोगितामा प्लेट च्याम्पियन समूहले ट्रफी, मेडल र प्रमाण पत्र पाउने छ ।
प्रतियाेगिता द ओसन क्लबकाे कृतिम घाँसे मैदानमा हुने छ ।