प्रतिकात्मक तस्बिर
एजेन्सी । देश अनुसारकाे भेष भने झै ठाउँ अनुसार बिहेकाे रिती फरक फरक भएकाे पाइन्छ । बिहेमा बेहुलाको जुत्ता लुकाउने परम्परालाई पनि धेरै ठाउँमा चलि आएकाे छ । बेहुलाको जुत्ता सालीहरुले लुकाउने र त्यसबापत रकम माग्ने प्रचलन धेरै पुरानाे पनि हाे ।
यही परम्पराका कारण एउटा बिहे रद्द नै भएको छ । शनिबार भारतको उत्तर प्रदेश राज्यको बिजनौरस्थित नजीबावाद निवासी खुर्शीदकी छोरीको विवाह हुदै थियो । देहरादुनमा सैलुन सञ्चालन गर्दै आएका मोहम्मद साबिरसँग खुर्शीदकी छोरीको विवाह हुँदै थियो ।
सोही क्रममा बेहुली पक्षले बेहुलाको जुत्ता लुकाइदिए । जुत्ता फिर्ता दिनका लागि उनीहरूले ५० हजार रुपैयाँ माग गरे । बेहुलाले ५ हजार रुपैयाँ दिने जनाए ।
यही विषयमा बिस्तारै विवाद बढ्न थाल्यो । रमाइलो मानिने यो परम्परा आखिर तनावमा परिणत भयो । बेहुला पक्षका अनुसार बेहुली पक्षले बेहुला र जन्तीमाथि कुटपिटमा नै उर्त्तीए ।
बेहुली पक्षले भने बिहेमा बेहुला पक्षबाट कारको माग गरिएको आरोप लगाएको छ । विवाद बढेपछि प्रहरीलाई खबर गरियो । प्रहरी कार्यालयमा दुवै पक्ष पुगे ।
त्यसपछि दुवै पक्ष विवाह नै रद्द गर्ने निष्कर्षमा पुगे । यो निर्णयसँगै बेहुला र जन्ती बेहुलीविना नै घर फर्किएका छन् ।