प्रतिकात्मक तस्बिर
काठमाडौं । प्रहरी प्रभाग साँखुको ब्यारेकमा कार्यरत १ जना महिला प्रहरी जवान झुन्डिएको अवस्थामा फेला परेकी छिन । झुन्डिएर मृत फेला परेकी प्रहरी जवान बर्दिया घर भएकी २३ वर्षीया निशा चाैधरी भएकाे साँखु प्रहरीले जानकारी दिएकाे छ ।
३ जना बस्ने गरेको ब्यारेकको कोठामा चौधरी सिलिङ फ्यानमा आफ्नै सलको पासो लगाएर झुन्डिएको अवस्थामा बुधबार मध्यान्ह मृत फेला परेकी हुन् ।
खाना खान भनेर आएकी चौधरी आफू सुत्ने कोठाबाट लामो समयसम्म पनि बाहिर ननिस्केको र बोलाउँदा पनि नबोलेपछि झ्याल फोडेर हेर्दा उनी सिलिङ फ्यानमा झुन्डिएको अवस्थामा मृत फेला परेको पाइएको प्रहरीले जनाएकाे छ ।
प्रहरी वृत्त गौशालामा कार्यरत उनी शाली नदी मेलाको ड्युटीका लागि थप मद्दत भन्दै खटिएकी थिइन् । विवाहित चौधरीका श्रीमान भने वैदेशिक रोजगारीमा विदेशमा छन् ।
परिवारका आफन्त आएपछि शव उठाएर पोस्ट मार्टमका लागि पठाउने तयारी प्रहरीले गरेकाे छ ।
