काठमाडाैं । आईसीसी १९ वर्षमुनिको महिला टी–२० विश्वकप क्रिकेटमा नेपाल अस्ट्रेलियासँग ८३ रनले पराजित भएसंगै समूह चरणबाटै बाहिरिएकाे छ । प्रतियाेगितामा नेपालकाे याे लगातार तेस्राे हार हाे ।
अस्ट्रेलियाले दिएकाे १४० रनकाे लक्ष्य पछ्याएकाे नेपालले २० ओभरमा ८ विकेट गुमाएर ५६ रनमात्र बनाउन सक्याे ।
नेपालकी कप्तान पूजा महताेले सबैभन्दा धेरै १८ रन बनाइन् । नेपालका अन्य खेलाडीले दाेहाेराे अंकमा रन बनाउन सकेनन् । अस्ट्रेलियाकी हसरत गिल, जुलिटी माेर्टन र लिली बेसिंगथवाइटले समान २/२ विकेट लिएका थिए ।
यसअघि मलेसियाको बाङ्गीमा रहेको यूकेएम क्रिकेट मैदानमा टस जितेर ब्याटिङ गरेकाे अस्ट्रेलियाले २० ओभरमा ६ विकेट गुमाएर १३९ रन बनायाे । अस्ट्रेलियाकी काओइम्हे ब्रेले ४५ रन बनाइन् । नेपालकी कप्तान पूजा महताेले ३, सिमाना केसीले २ र रिया शर्माले १ विकेट लिएकी थिइन ।
नेपाल पहिलो खेलमा बङ्गलादेशसँग ५ विकेट र दोस्रो खेलमा स्कटल्यान्डसँग १ विकेटले पराजित भएको थियो । नेपाल रहेकाे समूह ‘डी’ बाट अस्ट्रेलिया, बङ्गलादेश र स्कटल्यान्ड ‘सुपर–सिक्स’ मा पुगेका छन् । नेपालले पहिलो पटक १९ वर्षमुनिको महिला टी–२० विश्वकप खेलेको हो ।
प्रतियोगितामा १६ वटा टोलीलाई ४ वटा समूहमा विभाजन गरिएको छ । हरेक समूहका शीर्ष ३ टोली ‘सुपर–सिक्स’ मा पुग्नेछन् । १९ वर्षमुनिको महिला टी–२० विश्वकपको फाइनल खेल माघ २० गते हुनेछ ।
तस्वीर : क्यान
