म्याग्दी । जिल्ला प्रशासन कार्यालय म्याग्दीले अनलाइन प्रणालीमार्फत नागरिकताको सिफारिश गर्ने व्यवस्था मिलाएको छ । यस्तो व्यवस्थासँगै सेवाग्राहीले नागरिकताका लागि वडा कार्यालयबाट लिखित सिफारिशको कागजपत्र बोकेर प्रशासनमा धाउनुपर्ने समस्या हटेको छ ।
नागरिकता सिफारिशको कार्यलाई समयसापेक्ष, प्रविधिमैत्री र सेवाग्राहीलाई झन्झटरहित छिटोछरितो सेवा प्रवाह गराउन अनलाइन प्रणालीमार्फत नागरिकताको सिफारिश गर्ने व्यवस्था मिलाएको प्रमुख जिल्ला अधिकारी गुरूदत्त ढकालले बताए ।
अब गृह मन्त्रालयले विकास गरेको सफ्टवेयरमा वडा कार्यालयले सेवाग्राहीको विवरण भरेर कोड नम्बरसहित प्रशासनमा पठाउ छ । सङ्केत नम्बर लिएर आउने सेवाग्राहीको विवरण रूजु गरेर प्रशासनले नागरिकता प्रदान गर्ने उनले बताए ।
अनलाइन प्रणालीबाट नागरिकता सिफारिशसम्बन्धी सेवा प्रवाहका लागि वि.सं.२०६० चैत ७ गतेभन्दापछि जिल्ला प्रशासन कार्यालय म्याग्दीमार्फत वितरण भएका नागरिकताको विवरण सफ्टवेयरमा प्रविष्ट भएकाे छ ।