काठमाडाैं । नेपाल कबड्डी लिग (एनकेएल) को खेल तालिका सार्वजनिक गरिएको छ । राष्ट्रिय खेलकुद परिषद्को कर्भडहल, त्रिपुरेश्वरमा आउँदो माघ ४ गते हुने उद्घाटन खेलमा काठमाडाैं माभरिक्स र पोखरा लेकर्सबीच प्रतिस्पर्धा हुनेछ ।
एस्ट्रोनिक्स म्यानेजमेन्टले आयोजना गरेको नेपाल कबड्डी लिगमा काठमाण्डौ, पोखरा, बुटवल, विराटनगर, धनगढी र जनकपुर गरी ६ वटा शहरका टोलीले प्रतिस्पर्धा गर्दैछन् ।
खेल बेलुका साढे ५ र साढे ६ बजे हुनेछन् । राउन्ड रोबिन लिगमा १५ खेल हुने छन् । शीर्ष चार टोली अर्को चरणमा प्रवेश गर्नेछन् । लिगका शीर्ष दुई टोलीले माघ १४ गते क्वालिफायर एक खेल्नेछ, जसको विजेता सीधै फाइनलमा पुग्नेछ ।
त्यसैगरी लिगमा तेस्रो र चौथो स्थानमा रहने टोलीले माघ १४ गते नै इलिमिनेटरमा खेल्नेछ, जसको विजेता क्वालिफायर दुईमा पुग्नेछ ।
क्वालिफायर एकमा पराजित हुने टोली र इलिमिनेटरको विजेताबीच माघ १६ गते हुने क्वालिफायर दुईमा जित्ने टोली फाइनलमा पुग्नेछ । फाइनल खेल माघ १८ गते हुनेछ ।