काठमाडाैं । बुद्ध एअरकाे विमानको आपतकालीन ढोका खोल्ने २ जना यात्रुलाई जरिवाना तिराइएको छ । फरक २ उडानका क्रममा ढोका खोल्ने यात्रुलाई जनही १/१ लाख जरिवाना तिराइएको बुद्ध एअरले जनाएको छ ।
कम्पनीका अनुसार जरिवानाबापत यात्रुबाट प्राप्त रकम परोपकारी संस्थालाई हस्तान्तरण गरिएको छ । जनकपुरधामको महागङ्गा आरती–गङ्गासागर र पोखराको वृद्धाश्रमलाई १/१ लाख सहयोग गरिएको बुद्ध एअरले जनाएको छ ।
गएकाे बुधवार पोखराबाट काठमाडाैं उडान तयारीका क्रममा १ जना यात्रुले बिना कारण विमानको आपतकालीन ढोका खोलेका थिए । प्राविधिक टोलीको परीक्षणपछि ढिलो विमान उडेको थियो ।
यसैगरी गएको असोज २४ गते काठमाडाैंबाट जनकपुरका लागि बिहान ६ः०५ मा उडेको विमान जनकपुरको खराब मौसमका कारण डाइभर्ट भई विराटनगर पुगेको थियो ।
जनकपुरको मौसममा सुधार आएपछि विराटनगरबाट उड्ने तरखरमा रहेको विमानमा ट्याक्सी वेबाट धावनमार्ग पस्दै गर्दा अर्का १ जना यात्रुले विमानको आपतकालीन ढोका खोलेका थिए । त्यसपछि चालक दलले विमान पार्किङ–वेमै फर्काएका थिए । विमानको प्राविधिक जाँचपछि जनकपुर अवतरण गरेको थियो ।
हवाई उडानमा खलल पुर्याउने जोसुकैलाई ‘गैर सैनिक हवाई उडान (सिभिल एभिएसन) ऐन, २)१५’ अनुसार १ देखि ३ वर्षसम्म कैद तथा अपराधको प्रकृति हेरेर जन्मकैदसम्म सजाय हुने प्रावधान छ ।