एजेन्सी । ब्राजिलको दक्षिणी क्षेत्र ग्रामाडो शहरमा भएको निजी विमान दुर्घटनामा पाइलटसहित १० जनाको ज्यान गएको छ । दुर्घटनामा १ जना पाइलट र एकैपरिवारका ९ सदस्यको ज्यान गएको समाचार संस्था एएफपीले जनाएको छ ।
विमान दुर्घटना भएर बस्तीमा खस्दा एउटा घरको चिम्नी, अर्को एउटा घर र पसलमा समेत क्षति पुगेको छ । दुर्घटनामा विमान बाहिर रहेका १७ जना घाइते भएका रियो ग्रान्डे डो सुल राज्यको सुरक्षा सचिवालयले विज्ञप्तिमार्फत जानकारी दिएको हो । यसमध्ये २ जनाको अवस्था गम्भीर रहेको खबरमा उल्लेख छ ।
खराब मौसमकाबीच विमानले उडान भरेको थियो । विमान ३ किलोमिटर उडेपछि मानव बस्तीमा खसेको थियो । विमान रियो ग्रान्डे डो सुलको अर्को पर्यटकीय शहर क्यानेलाबाट उडेको थियो ।
ग्रामाडो ब्राजिलको एक लोकप्रिय पर्यटक शहर हो, जहाँ क्रिसमसको मौसममा पर्यटकहरूको उल्लेखनीय उपस्थिति हुन्छ ।
