काठमाडाैं । नेपाल प्रिमियर लिग (एनपीएल) मा समूह चरणको अन्तिम खेलमा आज कर्णाली याक्स र सुदूरपश्चिम रोयल्स खेल्दैछन् । त्रिवि क्रिकेट मैदान कीर्तिपुरमा बिहान ९ बजे खेल हुनेछ ।
यसअघि हिजोको खेलमा पोखरालाई हराउँदै सुदूरपश्चिम नेपाल प्रिमियर लिगको प्लेअफमा पुगेको छ । पोखरा यसअघि नै प्लेअफ पुग्नबाट बाहिरिसकेको छ । आज कर्णाली र सुदूरपश्चिमबीचको खेलमा कर्णालीको फराकिलो हार भएमा काठमाडाैंले प्लेअफमा स्थान बनाउनेछ ।
लुम्बिनी लायन्स, विराटनगर किङ्ग्स, पोखरा एभेन्जर्स प्रतियोगिताबाट बाहिरिसकेका छन् । ८ टोलीमध्ये जनकपुर प्ले अफमा पुगिसकेको छ । शीर्ष ४ मा पुग्न चितवन, काठमाडाैं र कर्णाली गरी ३ वटा टोलीबीच प्रतिस्पर्धा छ ।
सुदूरपश्चिम ६ खेलमा १० अङ्कसहित तालिकाको शीर्ष स्थानमा छ । जनकपुर बोल्ट्स ७ खेलमा १० अङ्कसहित तालिकाको दोश्रो स्थानमा छ । समान ७ खेल खेलेको चितवन ८ अङ्कसहित तेश्रो स्थानमा छ ।
६ खेलमा ८ अङ्कसहित कर्णाली चौथो स्थानमा छ भने ७ खेल खेलेको काठमाडाैं ८ अङ्कसहित पाँचौँ स्थानमा छ ।