सुर्खेत । सुर्खेतमा मावन सेवा आश्रमकाे भवन निर्माणार्थ श्रीमद भागवत सप्ताह ज्ञानविज्ञान महायज्ञ सुरु भएको छ । शुक्रबारदेखि वीरेन्द्रनगरस्थित खुलामञ्चमा महायज्ञ सुरु भएको हो ।
सडकमा जीवन विताउन बाध्य असहायलाई सेवा दिने उद्देश्यका साथ संरचना निर्माणार्थ महायज्ञ मंसिर २८ गतेसम्म चल्नेछ मानव सेवा आश्रमले जनाएकाे छ ।
शुक्रबार कर्णाली प्रदेशका मुख्यमन्त्री यामलाल कँडेलले महायज्ञको उद्घाटन गरेका हुन् । उद्घाटनका क्रममा सम्बोधन गर्दै मुख्यमन्त्री कँडेलले आश्रम निर्माणमा प्रदेश सरकारको सहयोग रहने बताए । ‘मानवताका लागि सबैले सहयोग गर्नुपर्छ, यो पुण्य काम हो,’ उनले भने, ‘पुण्य कार्यमा सहभागी हुन सबैलाई आह्वान पनि गर्दछु।’
महायज्ञमा भागवत भाष्कर कमलनयन गौतम प्रमुख कथावाचक रहनेछन् । महायज्ञ अवधिभर गौतमले नि:शुल्क कथा बाचन गर्ने भएका छन् । मानवसेवा आश्रमको पहलमा भएका यसअघिका महायज्ञमा पनि उनले नि:शुल्क कथावाचन गरेका थिए ।
महायज्ञमा सबै धर्म तथा परम्पराका पण्डित, गुरुहरुको सामुहिक उपस्थिति रहनेछ भने राष्ट्रिय तथा स्थानीय कलाकारहरुको प्रस्तुति रहनेछ । सामाजिक संस्कृति झल्किने झाँकी, नाच पनि प्रस्तुत गरिनेछ ।
महायज्ञबाट प्राप्त रकम मानवसेवा आश्रमको कर्णाली प्रदेशस्तरीय भवन निर्माणमा खर्च गरीने महायज्ञ मुल आयोजक समितिका संयोजक डा. नवराज केसीले बताए । यसका लागि वीरेन्द्रनगर नगरपालिका–११ मा रहेको गंगामाला धार्मिक तथा देउती बज्यै सामुदायिक वन समितिले २९ बिघा जग्गा दिएको छ । उक्त भवन बनाउनका लागि आवश्यक पुँजी जुटाउनका लागि उक्त महायज्ञ सुरु गरिएको हो ।
अहिले मानवसेवा आश्रम भाडाको भवनबाट सञ्चालित छ । ०७५ माघ १८ गतेदेखि सुर्खेतको वीरेन्द्रनगर नगरपालिका–१२ मा आश्रमले भाडाको घरबाट सेवा दिँदै आएको छ । उक्त आश्रममा अहिले ८० जना असहाय मानिस आश्रित छन् ।
भवन निर्माणका लागि कर्णाली प्रदेश सरकारले पनि भवन निर्माणका लागि चालु आर्थिक वर्षको बजेटमा १ करोड रुपैयाँ दिने घोषणा गरेको छ । महायज्ञबाट करिब ५ करोड रकम संकलन हुने अपेक्षा गरिएको छ ।
मुल आयोजक समितिका अनुसार ५०० देखि १ करोडसम्मको योगदान गर्ने दाताहरुलाई सम्मान गरिनेछ । १ करोडको योगदान गर्ने दाताको मानवसेवा आश्रमको कम्पाउण्डभित्र निर्माण हुने कुनैपनि ब्लकको नामकरणसहित दाताको अर्धकदको शालिक निर्माण गरिनेछ ।
५१ लाख ५१ हजारसम्म योगदान गर्नेलाई आश्रमको सभाकक्ष निर्माण गरी सोही कक्षमा शिलालेख गरिनेछ भने ३१ लाखसम्म योगदान गर्नेको आश्रमको भान्सा र भोजन कक्षको नामकरण गरी सोही कक्षमा शिलालेख राखिने छ ।
